දේශපාලන පළිගැනීම් පිළිබඳව විමර්ශනය සඳහා පත්කළ ජනාධිපති කොමිසමේ නිර්දේශ සදාචාරවිරෝධී බවත්, එපමණක් නොව එම කොමිසම පත් කිරීමම නීතිවිරෝධී බවත් සාධාරණ සමාජයක් සඳහා වන ජාතික ව්‍යාපාරයේ සභාපති කරු ජයසූරිය මහතා පවසනවා.
එම කොමිසමේ වර්තාව සම්බන්ධයෙන් පසුගියදා) පැවති සාකච්ඡාවකදී ජයසූරිය මහතා මේ බව සඳහන් කරන ලදි.
මෙම කොමිසමේ කටයුතු සහ අවසන් වාර්තාවේ නිර්දේශ හේතුවෙන් මහත් ආන්දෝලනයක් ඇතිව තිබෙන බවත් ලෝකයේ බොහෝ ප්‍රජාතන්ත්‍රවාදී රටවල නී‍තිවේදීන් විසින් එය සමච්චලයට ලක්කර ඇති බවත් කරු ජයසූරිය මහතා පෙන්වා දෙනවා.
යහපාලන රජය දූෂිතයන්ට දඬුවම් දීමේ ක්‍රියාවලිය ආරම්භ කළේ, ජනාධිපතිවරයාගේ, කැබිනට් මණ්ඩලයේ සහ සමස්ත රජයේම ඒකමතික තීරණය අනුව බවත්, විමර්ශන නිළධාරීන් පත් කිරීමේ සිට නඩු ගොනු කිරීම, අධිකරණ කටයුතු ඇතුළු සියල්ල නීත්‍යනුකූල හා විධිමත් ආකාරයෙන් සිදු වූ බවත් ජයසූරිය මහතා පෙන්වා දෙනවා. එසේ තිබියදී යහපාලන රජයේ ප්‍රධානීන්, ඇමතිවරුන් කිහිප දෙනෙකුට, විපක්ෂ මන්ත්‍රීවරුන් කිහිප දෙනෙකුට සහ පොලිස් හා නීති නිළධාරීන් කිහිප දෙනෙකුට එරෙහිව නඩු පැවරීමට නිර්දේශ කිරීම විකෘති පළිගැනීමේ චේතනාවෙන් සිදු කරන ලද්දක් බවට සිතන බවත් ඔහු පවසනවා.
මේ ආකාරයෙන් දේශපාලනඥයන්, නීති නිළධාරීන් දඩයම් කිරීමට කටයුතු කළහොත් ජාත්‍යන්තරය තුළ තවදුරටත් ශ්‍රී ලංකාව හුදෙකලා වීමේ අනතුරක් ඇති බවත් එසේ වුවහොත් ඉන් පීඩාවට පත් වන්නේද සාමාන්‍ය ජනතාව බවත් ‘සාධාරණ සමාජයක් සඳහා වන ජාතික ව්‍යාපාරය’ අවධාරණය කර සිටිනවා.
