රටේ භෞතික සම්පත් සංවර්ධනය කිරීම යටතේ මාර්ග සංවර්ධනය සඳහා ප්‍රමුඛතාව ලබාදී තිබෙන්නේ ඒ හරහා රටේ ආර්ථික සංවර්ධනයට අවශ්‍ය පහසුකම් සැලසීමට ග්‍රාමීය මාර්ග පද්ධතිය ශක්තිමත් කළ යුතු නිසා යැයි ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලන්සා මහතා පවසනවා.
2015 න් පසු මහාමාර්ග පද්ධතියේ සංවර්ධනයක් සිදුව නැති බැවින් මාර්ග කිලෝමීටර් ලක්ෂයක් සංවර්ධනය කිරීමේ ජාතික වැඩපිළිවෙල ආරම්භ කළ බවත් ඒ අනුව යහපාලන සමයේ ඉබි ගමනේ ගිය මධ්‍යම අධිවේගී මාර්ගයේ ඉදිකිරීම් කටයුතුද කඩිනම් කල බවත් නිමල් ලාන්සා මහතා පෙන්වා දෙනවා.
අමාත්‍යවරයා සදහන් කරන්නේ එහි මීරිගහ හා කුරුණෑගල කොටස මෙන්ම නව කැළණි පාලම හා ඒ ආශ්‍රිත අධිවේගී මාර්ග ජාලය නොබෝ දිනකින් ජනතා අයිතියට පත්කරන බවයි.
එමෙන්ම රුවන්පුර අධිවේගී මාර්ගය හා නව කැළණි පාලමේ සිට අතුරුගිරිය දක්වා කණු මතින් ඉදිවන අධිවේගී මාර්ගයේ වැඩකටයුතු මේ වන විටත් සිදුකෙරෙමින් පවතින බව ලාන්සා මහතා පවසනවා.
මෙවැනි ජාතික හා ප්‍රමුඛ සංවර්ධන ව්‍යාපෘති රටට දායාද කිරීමට හැකිවූයේ ජනාධිපති ගෝඨාභය රාජපක්ෂ මහතාගේ හා අග්‍රාමාත්‍ය මහින්ද රාජපක්ෂ මහතාගේ ඉදිරි දැක්ම නිසා බව රාජ්‍ය අමාත්‍යවරයා සදහන් කරනවා.
අමාත්‍යවරයා වැඩිදුරටත් සදහන් කරන්නේ කොවිඩ් 19 වසංගතය හමුවේ රටේ ප්‍රමුණ සංවර්ධන කාර්යයන්, ග්‍රාමීය ජීවනෝපාය, යටතල පහසුකම් යනාදී ක්ෂේත්‍ර නංවාලීම තුළින් ජාතික ආර්ථිකය ශක්තිමත් කිරීම සඳහා ඉදිරියට ගෙනියනු ලබන බවයි.
