සහල් තොග වෙළෙඳාමට සහ සිල්ලර වෙළෙඳාමට පනවා තිබූ මිල පාලනය ඉවත් කිරීමට ඊයේ (27) පස්වරුවේ පැවති අමාත්‍ය මණ්ඩල රැස්වීමෙදි තීරණය වී තිබෙනවා.
ඒ අනුව ඉකුත් සැප්තැම්බර් මස 02 දින සහල් සඳහා උපරිම තොග හා සිල්ලර මිලක් නියම කරමින් නිකුත් කළ ගැසට් නිවේදනය අවලංගු කර තිබෙනවා.
අවලංගු කරන ලද ගැසට් නිවේදනය තුළින් කීරි සම්බා සහල් කිලෝවක උපරිම සිල්ලර මිල රුපියල් 125 ක් ද, සුදු සහ රතු සම්බා සහල් කිලෝවක උපරිම සිල්ලර මිල රුපියල් 103 ක් ද, සුදු සහ රතු නාඩු සහල් කිලෝවක උපරිම සිල්ලර මිල රුපියල් 98 ක් ද, සුදු සහ රතු කැකුළු සහල් කිලෝවක උපරිම සිල්ලර මිල රුපියල් 95 ක් ලෙස ද රජය විසින් උපරිම සිල්ලර මිල ගණන් නියම කර තිබුණා.
කෙසේ වෙතත් උපරිම මිලක් නියම කර තිබු ගැසට් නිවේදන අවලංගු කිරීමත් සමග සහල් මෙට්‍රික් ටොන් 100,000ක් ආනයනය කිරීමට කැබිනට් මණ්ඩලයේ අනුමැතිය ලබාදී තිබෙනවා.
වෙළෙඳපොළේ කිසිදු කෘතිම සහල් හිඟයක් ඇතිවීම වැළැක්වීම පිණිස මෙම තීරණය ගෙන ඇති බව කැබිනට් අභ්‍යන්තර ආරංචි මාර්ග පවසනවා.
