ගාලු මුවදොර පිටියේ සංවර්ධන කටයුතු සිදුවන බැවින් සාමාන්‍ය ජනතාවට ගාලු මුවදොර පිටියට ඇතුළුවීම තහනම් කර ඇති බව වරාය අධිකාරිය නිවේදනය කරනවා.
මේ වන විට තාවකාලික වැටක් ඉදිකොට ගාලු මුවදොර පිටියට ඇතුළුවීම වළක්වා ඇති අතර අදාළ තහනම් නිවේදනය දැක්වෙන පුවරු තැන් තැන්වල ප්‍රදර්ශනය කර තිබෙනවා.
වරාය අධිකාරියේ සභාපති ආචාර්ය ප්‍රසන්ත ජයමාන්න මහතා පවසන්නේ ගාලුමුවදොර පිටිය යළි විවෘත කිරීමට තවත් මාස දෙකකට ආසන්න කාලයක් ගතවන බවයි.
ගාලු මුවදොරපිටියේ තණකොළ ගලවා එම නඩත්තු කටයුතු කරගෙන යන බවත් තණකොළවලට වතුර සැපයීමට අවශ්‍ය නල මාර්ග සකස් කරමින් යන බවත් ඒ මහතා සදහන් කරනවා.
එමෙන්ම ගාලු මුවදොරපිටියට පැමිණෙන ජනතාවට අවශ්‍ය කරන වැසිකිලි පහසුකම්ද මෙම හදිසි අලුත්වැඩියා කිරීම් අතර පවතිනවා.
වරාය අධිකාරියේ සභාපතිවරයා පවසන්නේ දැනට මාස 4 ක පටන් අදාළ අලුත්වැඩියා කිරීමේ කටයුතු සිදුකෙරෙමින් පවතින බවයි.
රටේ දැවැන්ත ආර්ථික අර්බුදයක් තිබෙන අවස්ථාවක ගාළු මුවදොර පිටියට තණකොල ඇල්ලීමට ආණ්ඩුවට මුදල් ඇතිදැයි සාමාන්‍ය ජනතාව ප්‍රශ්න කරනවා.
හදිසියේ ගාලු මුවදොර පිටිය වසාදැමීමට හේතුව අද (09) දිනයේ එම පිටියේ සංවිධානය කර ඇති දැවැන්ත විරෝධතාවය නිසා බව විරෝධතාකරුවන් සදහන් කරනවා.
කෙසේ වෙතත් කිසිදු වෙනස්කිරීමකින් තොරව එම විරෝධතාවය පවත්වන බවයි ඔවුන් සදහන් කරන්නේ.
