වාහන ආනයනය කිරීම සම්බන්ධයෙන් ජනාධිපතිවරයාගේ අත්සනින් නිකුත් කර තිබෙන ගැසට් නිවේදනයේ සඳහන් කොන්දේසි මත වාහන ආනයනය කළ නොහැකි තත්ත්වයක් නිර්මාණය වී තිබෙන නිසා රජය අපහසුතාවයට පත් කිරීමේ අරමුණෙන් යම් නිලධාරීන් පිරිසක් හිතාමතා ඒ කොන්දේසි නිර්මාණය කරන්නට ඇතැයි සැක සිතෙන බව ලංකා වාහන ආනයනකරුවන්ගේ සංගමයේ ප්‍රධාන ලේකම් ප්‍රසාද් කුලතුංග මහතා පවසනවා.
රජය නිකුත් කර ඇති වාහන ආනයනය පිළිබඳ ගැසට්ටුවේ ඇති වැරැදි හේතුවෙන් වාහන ගෙන්වීම ඇනහිටින තත්ත්වයක් උදා වී ඇති බවටයි ඔහු චෝදනා කරන්නේ.
මෙම ගැසට්ටුවට අනුව, ජපානයෙන් පරීක්ෂණ වාර්තා ලබාදීම එරට සමාගම් 4ක් ප්‍රතික්ෂේප කර ඇති බවද කුලතුංග මහතා පවසනවා.
ඒ අනුව වාහන ගෙන්වීමට නොහැකි වන බවයි ඔහු පවසන්නේ.
ඒ සමගම ගැසට්ටුවේ කොන්දේසිවලට අනුව කාර් ගොඩට වෑන් දැමීම නිසා හයිඒස් ඩීසල් වෑන් රථයක මිල රුපියල් ලක්ෂ 400 දක්වා ඉහළ යන බවද ඒ මහතා පෙන්වාදෙනවා.
එමෙන්ම මෙම වැරදි අඩුපාඩු හේතුවෙන් කිසිදු වාහනයක් මෙරටට ගෙන්වීමට නොහැකි වන බවද ප්‍රසාද් කුලතුංග මහතා වැඩිදුරටත් කියා සිටියා.
