බාල චීන පොහොර නැව ප්‍රතික්ෂේප කිරීමට හේතු වූ කරුණු සහිත වාර්තාවක් චීන තානාපති කාර්යාලයට ලබා දීමට තීරණය කර තිබේ.
කෘෂිකර්ම අමාත්‍යාංශ සහ රාජ්‍ය අමාත්‍යාංශ ලේකම්වරුන් විසින් එම වාර්තාව භාරදීමට තීරණය කර ඇති බවයි වාර්තා වන්නේ.
අදාළ ඇණවුම සිදුකළ යුතු ආකාරය, නිසි ප්‍රමිතියෙන් යුක්ත නොවීම මත පොහොර ප්‍රතික්ෂේප කිරිම ඇතුළු කරුණු ඇතුළත් කරමින් අදාළ වාර්තාව ලබා දීමට නියමිත බවයි කෘෂිකර්ම අමාත්‍යාංශ ලේකම් ජ්‍යෙෂ්ඨ මහාචාර්ය උදිත් කේ. ජයසිංහ මහතා පැවසන්නේ.
සකස් කෙරෙන වාර්තාව වගකිව යුතු සෙසු ආයතනවලට ද නිකුත් කිරීමට තීරණය කර ඇති බවත් එය අද දවස තුළ භාරදීමට අපේක්ෂා කරන බවත් ඔහු පවසනවා.
පොහොර තොගය ඇනවුම් කිරීම ඇතුළු කටයුතු විධිමත්ව සිදුව ඇති බවයි අමාත්‍යාංශ ලේකම් ජ්‍යෙෂ්ඨ මහාචාර්ය උදිත් කේ. ජයසිංහ මහතා පවසන්නේ.
කෙසේ වෙතත්, මතුව ඇති තත්ත්වය සලකා මෙලෙස සම්පුර්ණ වාර්තාවක් සකස් කර, චීන තානාපති කාර්යාලය ඇතුළු අදාළ පාර්ශව වෙත නිකුත් කරන බවත් ඔහු අවධාරණය කර සිටිනවා.
