ජීවිත පූජාවෙන් රැකගත් මාතෘභූමිය කැබලි කර විදේශිකයන්ට විකිණීමේ ක්‍රියාවලියක් රජය විසින් අරඹා ඇති බව හිටපු හමුදාපති, සමගි ජන බලවේගයේ පාර්ලිමේන්තු මන්ත්‍රී, ෆීල්ඩ් මාර්ෂල් සරත් ෆොන්සේකා මහතා පවසනවා.
ඒ අද (28) කොළඹ පැවති මාධ්‍ය හමුවකට එක්වෙමින්.
“මේ මාතෘභූමියට තියෙන අවදානම. කුඩා රටක් අපිට තියෙන්නේ. මේ රට අපි අතීතයේ ඉඳලා අවුරුදු 2000ක් පණවගේ ආරක්ෂා කරගත්තා ජීවිත පූජා කරලා. නමුත් මේ රජය විසින් මේ භූමිය කෑලි වලට කඩමින්, විදේශිකයන්ට විකුණමින්, කොමිස් ගසමින් කාලය ගත කරන බව අපිට පේනවා” යැයි ඒ මහතා පවසයි.
කොළඹ අගනුවරින් 50%ක් පමණ විදේශිකයන්ට විකිණීමට මේ වන විටත් සැලසුම් නිර්මාණය කර අවසන් බවත් මේ වන විට මාතෘභූමියට මේ හරහා තර්ජනයක් ඇතිවී ඇති බවත් සරත් ෆොන්සේකා මහතා පෙන්වා දෙනවා.
මේ වන විට මෙරට සාගර කලාපයද අනතුරකට මුහුණ දී ඇති බවත් පසුගිය කාලයේදී සිදුවූ නැව් ගිණිගැණීම් කිසියම් සැලසුමකට සිදුව ඇතිබව නිගමනය කළ හැකි බව පවසන හිටපු හමුදාපතිවරයා වැඩිදුරටත් පවසන්නේ ඒ හරහා ලැබෙන වන්දි සම්බන්ධව විනිවිදබවක්ද නොමැති බවයි.
