සතියකට වැඩි කාලයක සිට උතුරු ඉන්දියාවේ උත්තර ප්‍රදේශ් ප්‍රාන්තයේ සමහර දිස්ත්‍රික්කවල ළමයින් අතර අභිරහස් උණක් පැතිරයන බව BBC පුවත් සේවය වාර්තා කර තිබේ.
මෙම උණ රෝගය වැළඳුණු දරුවන් දැඩි උණ සහ නින්දෙන් අවදිවන විට දහඩියෙන් තෙත් වී සිටින බව දරුවන්ගේ දෙමව්පියන් මාධ්‍ය වෙත පවසා ඇත.
ඔවුන්ගෙන් බොහෝ දෙනෙක් සන්ධි වේදනාව, හිසරදය, විජලනය සහ ඔක්කාරය යන රෝග ලක්ෂණවලින් පෙළෙන බව සඳහන් වේ.
සමහර අවස්ථාවලදී කකුල් සහ අත් හරහා දද කුෂ්ඨ වැනි තත්ත්වයන ද වාර්තා වී තිබේ.
ප්‍රාන්තයේ නැගෙනහිර කොටසේ දිස්ත්‍රික්ක හයක අවම වශයෙන් පුද්ගලයින් 50 දෙනෙකු මෙම උණ රෝගය හේතුවෙන් මිය ගොස් ඇති අතර ඉන් වැඩි ප්‍රමාණයක් දරුවන් බවයි වාර්තා වන්නේ.
තවත් සිය ගණනක් රෝහල් ගත කර ඇත.මියගිය කිසිවෙක් කොවිඩ්-19 ආසාධනය වී නොමැති බව ද තහවුරු කරගෙන තිබේ.
මාරාන්තික දෙවන කොවිඩ්-19 රැල්ලෙන් ඉන්දියාව සෙමෙන් සුවය ලබන බවක් පෙනෙන්නට තිබෙන අවස්ථාවක, ඉන්දියාවේ වැඩිම ජනාකීර්ණ ප්‍රාන්තයක් වන උත්තර් ප්‍රදේශ් හි ගම්බද ප්‍රදේශයන් හරහා පැතිර යන “අභිරහස් උණ” ගැන නැවත වතාවක් ඉන්දියාව බියෙන් සැලී ගොස් ඇතැයි මාධ්‍ය වාර්තා පෙන්වා දෙයි.
