හෙද වෘත්තිය සමිති කිහිපයක් දිවයින පුරා රෝහල්වල ආරම්භ කර ඇති හෙද වැඩවර්ජනය අද (02) දෙවන දිනටත් ක්‍රියාත්මක කෙරෙනවා.
ඊයේ දිනයේ ආරම්භ කෙරුණු මෙම වර්ජනයට බලධාරින් විසින් මේ වන තෙක්ම නිසි විසඳුම් ලබා නොදීම හේතුවෙන් අද දිනයේ ද වර්ජනය ක්‍රියාත්මක කිරීමට තීරණය කළ බව රාජ්‍ය සේවා එක්සත් හෙද සංගමයේ මුරුත්තෙට්ටුවේ ආනන්ද හිමි පවසනවා.
රජයේ හෙද නිලධාරින්ගේ සංගමයේ කැඳවුම්කරු, සමන් රත්නප්‍රිය මහතා සඳහන් කරන්නේ අත්‍යවශ්‍ය සේවාවන්ට බාධාවක් නොවන අයුරින් එම වර්ජනය සිදුකරන බවයි.
වර්ජනයට හේතු ලෙස,
• හෙද නිලධාරින් වසර පහෙන් පහට ශ්‍රේණිගත උසස්වීම් ලබාදීම
• දින 6ක සේවා සතිය වෙනුවට රජයේ අනෙකුත් සේවකයින්ට මෙන් දින 5ක සේවා සතියක් ලබාගැනීම.
• කොවිඩ් වසංගතය හමුවේ හෙද නිලධාරීන් මුහුණ පා ඇති ගැටලු සඳහා කඩිනම් විසඳුම් ලබාදීම.
ඇතුළු ඉල්ලීම් කිහිපයක් ඇතුළත්.
ඊයේ දිනයේ ක්‍රියාත්මක වර්ජනය නිසා දිවයින පුරා රෝහල්වල වැඩකටයුතු අඩාලවී තිබුණා.
බාහිර රෝගි ප්‍රතිකාර සේවා මෙන්ම නේවාසිකව ප්‍රතිකාර ලබන රෝගී සේවාවල කටයුතුවලටද බාධා එල්ලවූ අතර මේ නිසා රෝගීන් දැඩි දුෂ්කරතාවයට පත්ව සිටියා.
