වසර 10 කට වැඩි කාලයක් රජයේ වෛද්‍ය නිලධාරීන්ගේ සංගමයේ සභාපතිවරයා ලෙස කටයුතු කළ විශේෂඥ වෛද්‍ය අනුරුද්ධ පාදෙනිය මහතාගේ ධූරය ඊයේ (11) සිට අවසන් වුණා.
ඒ අනුව මෙවර කිසිදු නිලවරණයක් නොමැතිවම නිතරඟයෙන් ස්නායු රෝග විශේෂඥ වෛද්‍ය දර්ශන සිරිසේන මහතා නව සභාපතිවරයා ලෙස තේරී පත්වුණා.
එමෙන්ම නව ලේකම්වරයා ලෙස වෛද්‍ය හරිත අලුත්ගේ මහතාද නිතරඟයෙන් තේරී පත්ව තිබුණා.
පසුගිය මැයි 21 වනදා අදාළ ධූර දෙක සඳහා විශේෂඥ වෛද්‍ය දර්ශන සිරිසේන හා වෛද්‍ය හරිත අලුත්ගේ යන මහත්වරුන් නාමයෝජනා භාරදී තිබූ අතර ඊට තරඟ කිරීම සඳහා වෙනත් කිසිදු පාර්ශවයක් ඉදිරිපත් නොවීම නිසා ඊයේ පැවති වාර්ෂික මහා සමුළුවේදී අදාල නාමයෝජනා දෙක සම්මත වීමෙන් පසුව නව තනතුරු දෙක බලාත්මක වී තිබෙනවා.
වාර්ෂික මහා සමුළුවෙන් පසුව හිටපු සභාපති අනුරුද්ධ පාදෙනිය මහතා නව සභාපතිවරයාට සුබ පතා ඇති අතර රජයේ වෛද්‍ය නිලධාරීන්ගේ සංගමයේ ඉදිරි වැඩකටයුතු පවත්වාගෙන යෑමට ඔහුගේ සම්පූර්ණ සහය ලබාදෙන බවද සදහන් කළා.
මේ වන විට රජයේ වෛද්‍ය නිලධාරීන්ගේ සංගමයේ විධායක සභාවේද පසුගිය පාදෙනිය පාලන සමයේ සිටි වෛද්‍යවරුන් 11 දෙනාගෙන් 8 දෙනෙකු ඉවත්කර නව සාමාජිකයින් පත්කරගෙන තිබෙනවා.
ඒ අනුව ඉදිරි වසර සඳහා වන දස වැදෑරුම් ප්‍රතිපත්තියක් සකස් කොට එය එළැඹෙන බදාදා 15 දිනයේ මාධ්‍ය හමුවට ඉදිරිපත් කරන බව නව ලේකම් හරිත අලුත්ගේ මහතා News19 වෙත සඳහන් කළා.
