වසර කිහිපයක් සඳහා බලයට පැමිණෙන රජයකට මෙරට භූමිය විදෙස් රටවලට බදුදීමට හෝ විකිණීමට කිසිදු අයිතියක් නොමැති බව පූජ්‍ය ඕමල්පේ සෝභිත හිමි පවසනවා.
ඇඹිලිපිටිය ප්‍රදේශයේ පැවති ප්‍රවෘත්ති සාකච්ඡාවකට එක්වෙමින් උන්වහන්සේ සඳහන් කළේ විවිධ උපායමාර්ග හරහා රට අත්පත් කරගැනීමට ඇතැම් පාර්ශ්ව උත්සාහ දරමින් සිටින බවයි.
“බෙදුම්වාදී කණ්ඩායම් රට කොටස් වශයෙන් බෙදාගන්න ගත් උත්සහය අවුරුදු 30ක අරගලයකින් අවසන් කළා. දැන් අපිට මුහුණ දෙන්න වෙලා තියෙන්නේ ඒ වගේම තවත් ප්‍රශ්නයකට. ඒ වෙනත් උපාය මාර්ග මගින් රටේ කොටස් අත්පත් කරගන්නා උත්සාහය. අපි ඒක දකිනවා වරාය නගරය එසේත් නැත්නම් නවීන චීන කොළනිය ලෙස. බිහිවීමට නියමිත නව චීන කොළනිය ප්‍රතික්ෂේප විය යුතුයි. අවුරුදු 5කට හෝ 6කට බලයට එන ඔබලාට අයිතියක් නෑ, යුතුකමක් නෑ ශතවර්ෂ ගණනාවකට රටේ බිම් කොටස් ඒ ඒ කණ්ඩායම්වලට බදුදෙන්න හෝ විකුණන්න.”
මේ අතර අද (17) පැවති ප්‍රවෘත්ති සාකච්ඡාවකදී පූජ්‍ය ඇල්ලේ ගුණවංශ හිමි පවසා සිටියේ ආණ්ඩුව මෙලෙස අන්තනෝමතික ලෙස ජාතික සම්පත් විකුණමින් කටයුතු කරන්නේ නම් ඊට එරෙහිව ජාතික බලවේග ඒකරාශී කිරීමේ නව වැඩපිළිවෙලක් ක්‍රියාත්මක කරන බවයි.
