ඉන්දියාව, වියට්නාමය, දකුණු අප්රිකානු රටවල් සහ දකුණු ඇමරිකානු රටවලින් පසුගිය දින 14 තුළ පැමිණි හෝ සංචාරක ඉතිහාසයක් ඇති පූර්ණ එන්නත ලබා ඇති ශ්රී ලාංකිකයන්ට හෝ ද්විත්ව පුරවැසියන්ට නිවාස නිරෝධායනය සඳහා ඉඩ නොදෙන අතර ඒ වෙනුවට නිරෝධායනයට යා යුතු බව දන්වමින් සෞඛ්ය අමාත්යාංශය මාර්ගෝපදේශ මාලාවක් නිකුත් කර ඇත
අනෙකුත් සියලුම රටවලින් පැමිණෙන ශ්රී ලාංකිකයන් හෝ ද්විත්ව පුරවැසියක් PCR පරීක්ෂාවකට භාජනය කර වෛරසය ආසාධනය වී නොමැති නම් දින 14 ක නිවාස නිරෝධායනය සිදු කළ හැකි බව එම මාර්ගෝපදේශයන් හි සඳහන් වෙයි.
ඕනෑම රටකින් පැමිණෙන සියලුම ශ්රී ලාංකිකයන් හෝ ද්විත්ව පුරවැසියන් ඉංග්රීසි භාෂාවෙන් කොවිඩ්-19 පරීක්ෂණ වාර්තාවක් රැගෙන ආ යුතුය.
සියලුම ශ්රී ලාංකික පුරවැසියන් ගුවන් ගත වීමට පෙර පැය 96 ක් තුළ සිදුකරන ලද PCR පරීක්ෂණයක් හෝ ගමන ආරම්භ කිරීමට පැය 48 ක් ඇතුළත ලබාගත් ප්රතිදේහජනක පරීක්ෂණයක් අනිවාර්යයෙන්ම සිදු කළ යුතු අතර ද්විත්ව පුරවැසියන් ගමන ආරම්භ කිරීමට පැය 96 ක් ඇතුළත ලබා ගත් PCR පරීක්ෂණ වාර්තාවක් රැගෙන ආ යුතුය.
ඉහත සඳහන් රටවල් හැරුණු විට ගුවන් මගින් පැමිණෙන ශ්රී ලංකා නාවිකයින් ඇතුළු ශ්රී ලංකා පුරවැසියන් හෝ ද්විත්ව පුරවැසියන් නිරෝධායන හෝටලයක හෝ මධ්යස්ථානයක හෝ ආරක්ෂිත හා සහතික කළ මට්ටමේ පළමු හෝටලයක රැඳී සිටිය යුතුය.
සෘණාත්මක කොවිඩ්-19 පරීක්ෂණයකින් පසු හෝටලය හෝ මධ්යස්ථානය භාරව සිටින නිලධාරියා, PCR පරීක්ෂණයේ තත්ත්වය තහවුරු කිරීමෙන් පසු සම්පූර්ණ එන්නත ලබා දුන් පුද්ගලයින් නිදහස් කළ යුතුය. ඉන්පසු ඔවුන් මෙම ශ්රී ලාංකිකයින්ට සහ ද්විත්ව පුරවැසියන්ට විසර්ජන ලේඛනයක් නිකුත් කර තොරතුරු වසංගත රෝග විද්යා ඒකකයට විද්යුත් තැපෑලෙන් එවිය යුතුය.
ශ්රී ලාංකිකයන් හෝ ද්විත්ව පුරවැසියන් පසුව පදිංචි ස්ථානයට හෝ නිවසට යාමට තමන්ගේම ප්රවාහන පහසුකම් පිළියෙළ කළ යුතු අතර මේ සඳහා පොදු ප්රවාහනය භාවිතා නොකළ යුතුය. ඔවුන් කිසිදු නැවතුමකින් තොරව ගමනාන්තයට කෙලින්ම ගමන් කළ යුතුය.
නිවසට පැමිණි වහාම ඔවුන් තම ප්රදේශයේ සෞඛ්ය වෛද්ය නිලධාරියා වෙත දුරකථනයෙන් හෝ විද්යුත් තැපෑලෙන් දැනුම් දිය යුතුය.
අවසාන අදියරේ දී, සෞඛ්ය අමාත්යාංශයේ අනුමත රසායනාගාරයකදී 14 වන දින ඔවුන් තවත් කොවිඩ්-19 PCR පරීක්ෂණයකට භාජනය කරනු ලබන අතර වාර්තාව ප්රදේශභාර සෞඛ්ය වෛද්ය නිලධාරිවරයා වෙත ඉදිරිපත් කළ යුතුය. නිවෙස් නිරෝධායනයෙන් ඔවුන් මුදා හරිනු ලබන්නේ එම සෘණාත්මක PCR වාර්තාව සමඟ පමණි.