මේ වන විට දැඩි ආන්දෝලනයට තුඩුදී තිබෙන ජනාධිපති ගෝඨාභය රාජපක්ෂ මහතා අම්පාරේදි සිදුකල කතාව පිළිබදව සටහනක් බස්නාහිර පළාත භාර නියෝජ්‍ය පොලිස්පති දේශබන්දු තෙන්නකෝන් මහතා සිය නිල ෆේස්බුක් ගිණුමේ සදහන් කර තිබෙනවා.
“නියම කතාව ජනපතිතුමනි” යන ශීර්ෂපාඨය යටතේ ඇති එම සටහනෙහි දැක්වෙන්නේ පාර්ලිමේන්තු මන්ත්‍රී හරීන් ප්‍රනාන්දු මහතා ඉලක්ක කොට ගෙන ජනාධිපතිවරයා සිදුකල අම්පාර කතාවෙහි කොටසකි.
සරත් වීරසේකර මහතාගේ මැතිවරණ ව්‍යාපාරය වෙනුවෙන් නිර්මාණය කර ඇති ෆේස්බුක් කණ්ඩායමකට (Facebook Group) ඉනෝකා රාජපක්ෂ නැමැති කාන්තාවක් එක් කර ඇති එම සටහන දේශබන්දු තෙන්නකෝන් මහතාද සිය ෆේස්බුක් ගිණුමේ බෙදාගෙන (Share) තිබෙනවා.
මේ අතර ජනාධිපති ගෝඨාභය රාජපක්ෂ මහතාගේ ප්‍රකාශය සම්බන්ධයෙන් සාධාරණ සමාජයක් සදහා වන ජාතික ව්‍යාපාරයද නිවේදනයක් නිකුත්කර තිබෙනවා.
එහි දැක්වෙන්නේ සමහර ස්වාමීන් වහන්සේලා විසින් ජනාධිපතිවරයා හට ජනාධිපති මෙන් නොව හිටපු ආරක්ෂක ලේකම් ලෙස ක්‍රියාකරන ලෙස ඉල්ලා සිටින බව සදහන්වී ඇති බැවින් ඒ කරුණ සමාජයෙහි හා සංඝරත්නය තුළ විශාල ආන්දෝලනයක් ඇතිවී තිබීම ගැන අතිශයින්ම කණගාටුවට පත්වන බවයි.
බෞද්ධ භික්ෂූන්වහන්සේ නමක් විසින් කිසි දිනෙක ප්‍රාණඝාතය අනුමත නොකරන බැවින් කිසි විටෙකත් උන්වහන්සේලා තුළ එවැනි සිතිවිල්ලක් ඇති නොවුනු බව අපගේ දැඩි විශ්වාසය බවත් නිවේදනයේ වැඩිදුරටත් සදහන්.
කෙසේ වෙතත් මෙම සිදුවීම නිසා රටේ කීර්තිනාමයට විශාල හානියක් සිදුව ඇති බවත් ප්‍රජාතන්ත්‍රවාදය රජයන සමාජයක ප්‍රචන්ඩත්වයට හා ජීවිත තර්ජන කිසි ලෙසකත් අනුමත නොකරන බවත් නිවේදනය මගින් සාධාරණ සමාජයක් සදහා වන ජාතික ව්‍යාපාරය සදහන් කරනවා.
වැඩිදුර කියවන්න
