ගෝඨාභය රාජපක්ෂ මහතා බලයට පත් කිරීම වෙනුවෙන් තුරුම්පුවක් ලෙස දොස්තර සාෆි සහබ්දීන් මහතාගේ වඳ සැත්කම් සිදුවීම යොදාගත් බවට තරුණ ජනමාධ්‍යවේදීන්ගේ සංගමයේ සභාපති මාධ්‍යවේදී තරිදු ජයවර්ධන මහතා පවසනවා.
අන්තර්ජාල නාලිකාවක් සමඟ විශේෂ සංවාදයකට එක්වෙමින් ඔහු පවසන්නේ පොලිසිය, අධිකරණය සහ රෝහල් ඇතුළු ආයතන කිහිපයක පුද්ගලයින් රැසක්ද මෙම කුමන්ත්‍රණයට සම්බන්ධවී කටයුතු කර ඇති බවයි.
එමෙන්ම පාර්ලිමේන්තු මන්ත්‍රී අතුරලියේ රතන හිමි ඇතුළු පිරිසක්ද අදාළ පරීක්ෂණවලට සහභාගී වූ විමර්ශන නිලධාරීන්ට බලපෑම් කර ඇති බවද ජයවර්ධන මහතා මෙහිදී සදහන් කරනවා.
2019 මැයි මස 23 වනදා ‘තවුහීද් ජමාත් දොස්තර සිංහල මව්වරුන් 4000ක් වඳ කරලා’ යන මැයෙන් මෙරට ප්‍රසිද්ධ ජාතික පුවත්පතක පළවූ පුවතක් හේතුවෙන් මෙරට ජන සමාජය තුළ බරපතළ අර්බුද රැසක් නිර්මාණය වූ අතර මෙම සිද්ධිය හේතුවෙන් කුරුණෑගල රෝහලේ නාරි හා ප්‍රසවවේදය පිළිබඳ වෛද්‍ය සාෆි සහබ්දීන් මහතා පොලිස් අත්අඩංගුවට පත් වූ අතර ඔහුගේ රැකියාවද ඔහුට අහිමි වුණා.
කෙසේ වෙතත් සිදු කරන ලද විමර්ශන වලදී මෙම සිදුවීම නිර්මාණය කරන ලද ව්‍යාජ එකක් බව තහවුරු වී ඇති අතර වෛද්‍ය සාෆි සහබ්දීන් මහතාට හිඟ වැටුප් ද ගෙවමින් යළි සේවයේ පිහිටුවීමට මේ වන විට පියවර ගෙන තිබෙනවා.
