අද (21) දිනයේ පාසල් නොපැමිණෙන විදුහල්පතිවරුන් හට යළිත් එම පාසල භාර නොදෙන බව උතුරුමැද පළාත් ආණ්ඩුකාර මහීපාල හේරත් මහතා පවසනවා.
ආණ්ඩුකාරවරයා සදහන් කරන්නේ ඒ වෙනුවට අද දිනයේ පාසලට පැමිණෙන පුද්ගලයා හට පාසල භාරදෙන බවයි.
කොවිඩ් වසංගතය හේතුවෙන් මාස ගණනාවක් වසා දමා ඇති පාසල් අද දිනයේ වීවෘත කිරීමට රජය ගෙන ඇති තීන්දු සම්බන්ධයෙන් සොයා බලා දැනුවත්කිරීමේ හමුවක් උතුරුමැද පළාත් සභා ශ්‍රවණාගාරයේ පැවැත්වූ බවත් එහිදී මෙම ක්‍රියාවන් සම්බන්ධයෙන් දැඩි තීන්දු ගැනීමට තීරණය වූ බවත් ආණ්ඩුකාරවයා පවසනවා.
“මේක ජාතික මට්ටමේ තීන්දුවක්. මේ කරන පිකටින් එක පාසල් විවෘත කරන එකට අදාළ දෙයක් නෙවෙයි. ඒක වැටුප් පිළිබද එකක්. පාසල් අරිනවාට විරෝධතාවක් නෙවෙයිනෙ මේ ගෙනියන්නේ. එහෙම නම් හැම කෙනෙක්ම පාසලට එන්න ඕනේ. එහෙම නාවොත් අපි එනකෙනාට පාසල භාර දෙනවා. ඒක තමයි අපි තීන්දු කරලා තියෙන්නේ.
එමෙන්ම අද (21) දිනයේ පාසලට පැමිණෙන ගුරුවරුන්ට විශේෂ ආරක්ෂාවක් ලබාදීමටත්, කඩාකප්පල්කාරී ක්‍රියා සිදුකරන පුද්ගලයින් අත්අඩංගුවට ගැනීමට විශේෂ වැඩපිළිවෙලක් ක්‍රියාත්මක කිරීම සදහා බලධාරීන්ට උපදෙස් ලබාදුන් බවත් මහීපාල හේරත් මහතා වැඩිදුරටත් සදහන් කරනවා.
