කොවිඩ්19 වෛරසයේ මූලාශ්‍රය සෙවීම සඳහා ලෝක සෞඛ්‍ය සංවිධානය දියත්කරන විමර්ශනයේ දෙවන අදියර සඳහා සහය නොදීමට චීන රජය තීරණය කර තිබෙනවා.
ඒ වූහාන් පර්යේෂණාගාරයකින් වෛරසය මුදා හැරුණු බව පර්යේෂණ යෝජනාවට ඇතුලත් වීම මුල්කරගනිමින්.
එරට ජාතික සෞඛ්‍ය කොමිසමේ නියෝජ්‍ය ප්‍රධානියා ප්‍රවෘත්ති සාකච්ඡාවකදී පැවසුවේ පර්යේෂණාගාරයකින් වෛරසය මුදා හැරුණු බව මෙම දෙවන අදියරේ අධ්‍යයනයේ අරමුණුවලට ඇතුලත්ව තිබීම චීන රජය ‘මවිත’ කරවූ බවයි.
ඇතැම් අංශවලින් ගත් කළ ලෝක සෞඛ්‍ය සංවධානයේ අධ්‍යයනය විද්‍යාත්මක නොවන බැවින් එවැනි සැලසුමකට එකඟ විය නොහැකි බව ඔහු වැඩිදුරටත් සඳහන් කළා.
මේ අතර ඇමෙරිකානු රාජ්‍ය දෙපාර්තමේන්තුව පසුගියදා නිවේදනය කළේ කොවිඩ්19 වෙරසය පිළිබඳ නිල වශයෙන් ප්‍රකාශ කිරීමට පෙර වූහාන් පර්යේෂණාගාරයේ සේවකයින් කිහිප දෙනෙකුට කොරෝනා වෛරසය ආසාදිත වූ බවයි.
නමුත් මෙම ප්‍රවෘත්ති සාකච්ඡාවේදී ජාතික සෞඛ්‍ය කොමිසමේ නියෝජ්‍ය ප්‍රධානියා එම චෝදනා ප්‍රතික්ෂේප කළේ පර්යේෂණාගාරයේ කිසිවෙකුට හෝ කොරෝනා වෛරසය ආසාදිත නොවූ අවධාරණය කරමින්.
පසුගිය මාර්තු මාසයේදී ලෝක සෞඛ්‍ය සංවිධානය සිය අතුරු වාර්තාවක් මගින් සඳහන් කළේ කොවිඩ් වෛරසය සතෙකුගෙන් බිහි වූ බවයි.
කෙසේවෙතත් G 7 නායකයින් ඇතුලු බටහිර රටවල් ගණනාවක් මෙම වාර්තාවේ සම්පූර්ණත්වය සම්බන්ධයෙන් ප්‍රශ්න කළා.
කොවිඩ් 19 වසංගතයේ ආරම්භය සම්බන්ධයෙන් අධ්‍යයනය කරන ලෙස ඇමෙරිකානු ජනාධිපති ජෝ බයිඩන් ද පසුගියදා එරට බුද්ධි අංශ වෙත උපදෙස් ලබා දුන්නා.
ලෝක සෞඛ්‍ය සංවිධානයේ ප්‍රධානියාද පසුගියදා චීනයෙන් ඉල්ලා සිටියේ වෛරසයේ ආරම්භය පිලිබද සිදුකෙරෙන විමර්ශන සඳහා පූර්ණ සහයෝගය ලබා දෙන ලෙසයි.
