එළඹෙන වසරේ අප්‍රේල් 15ට පෙර ප්‍රමාණවත් ගල් අඟුරු නොලැබුණහොත් ඉතිහාසයේ මෙතෙක් සිදුවූ දීර්ඝතම විදුලි කප්පාදුවට මෙරට ලක්විය හැකි බව ලංකා විදුලිබල මණ්ඩලයේ ඉංජිනේරු සංගමය අනතුරු අඟවනවා.
කොළඹ අද (28) පැවැති මාධ්‍ය හමුවකට එක්වෙමින් එම සංගමයේ සභාපති නිහාල් වීරරත්න මහතා කියා සිටියේ මේ වන විට ගල් අඟුරු මෙට්‍රික් ටොන් 60000ක් රැගත් නෞකා 38ක් රටට අවශ්‍ය වුවත් මේ දක්වා මෙරටට පැමිණ ඇත්තේ නැව් 4ක් පමණක් බවයි.
එහිදී වැඩිදුරටත් අදහස් දැක්වූ ඒ මහතා, “වාරකන් කාලය 2022 සැප්තැම්බර් අවසන් වුණා. එතන ඉඳලා 2022 ඉතිරි මාස දෙක සහ 2023 අප්‍රේල් දක්වා විදුලි ජනනය සඳහා අවශ්‍ය ගල් අඟුරු ප්‍රමාණය මෙට්‍රික් ටොන් 60000ක්. ඒ කියන්නේ නැව් 38ක්. එත් මේ වෙනකොට ඇවිත් තියෙන්නේ නැව් 4යි. පස්වෙනි නැවේ කිසියම් ප්‍රශ්ණයක් නිසා ප්‍රමාදයක් වෙනවලු. මේ නැව් 38 ලබා ගන්නේ නැත්නම් අප්‍රේල් 15 වෙද්දී අපිට පැහැදිලිව කියන්න පුළුවන් ජුලි, අගෝස්තු, සැප්තැම්බර් වෙනකොට ලොකු විදුලි කප්පාදුවක් වෙනවා කියන එක. ඒක සමහරවිට ඉතිහාසයේ දරුණුම විදුලි කප්පාදුව වෙන්න පුළුවන්. ඒකයි අපි 2023 කළුවර ජූලියක් වෙන්න පුළුවන් කියන එක. තවත් නැව් 20ක් ඇනවුම් කරලා එකෙන් ඇවිත් තියෙන්නේ නැව් 4යි. තව නැව් 16ක් තියෙනවා. පුළුවන් තරම් ඉක්මණට ඒවා ඇනවුම් කරන්න ඕන. රටේ අවශ්‍යතාවයෙන් ලක්විජය බලාගාරය විදුලිය ලබාදෙන්නේ 45%ක ප්‍රමාණයක්. ගල් අඟුරු නොලැබුණහොත් වෙනත් තාප විදුලි බලාගාරවලින් විදුලිය මිලදී ගන්න වෙනවා. ඒකට ලොකු වියදමක් දරන්න වේවි. ලංකා විදුලි බල මණ්ඩලය විදියට අපේ අපේක්ෂාව අඩු මුදලින් විදුලිය නිපදවා ගන්න. එහෙම බැරි උනොත් පැහැදිලි විදුලි විසන්ධියකට යන්න වෙනවා. හැබැයි ඒ වගේ වෙලාවක හදිසි විදුලිය මිලදී ගැනීම් කරන්න බැහැ”.
