මහජන උපයෝගිතා කොමිෂන් සභාවේ හිටපු සභාපති ජනක රත්නායක මහතා ඉදිරි ජනාධිපතිවරණයට ඉදිරිපත්වීම සඳහා සිය පක්ෂයෙන් නාමයෝජනා ලබාදීමට රුපියල් ලක්ෂ 300ක අල්ලසක් ලබාගැනීමේ සිද්ධිය සම්බන්ධයෙන් සැකපිට අත්අඩංගුවට ගෙන තිබූ එක්සත් ලංකා පොදුජන පක්ෂයෙන් නිලධාරීන් දෙදෙනා යළිත් රක්ෂිත බන්ධනාගාරගත කර තිබෙනවා.
එම නිලධාරීන් දෙදෙනා ලබන 18 වැනිදා දක්වා තවදුරටතේ රක්ෂිත බන්ධනාගාර ගතකිරීමට කොළඹ ප්‍රධාන මහෙස්ත්‍රාත් තිළිණ ගමගේ මහතා ඊයේ (10) නියෝග කළා.
එම නඩුවේ පළමුවන සැකකරු වසර නවයක් පැරණි එම පක්ෂයේ නිලධාරියකු ලෙස කටයුතු කළ අයකු බවත් ඔහු ස්වාධීන අපේක්ෂකයකු ලෙස ජනාධිපතිවරණයට ඉදිරිපත් වීමට දැරූ උත්සාහය ව්‍යර්ථ වීම නිසා වෙනත් පිටස්තර අයකුට එම නාමයෝජනා භාර දීමට පියවර ගෙන ඇතත් ඒ සඳහා කිසිදු අල්ලසක් ඉල්ලා හෝ ලබාගෙන නොමැති බව එම සැකකරු වෙනුවෙන් පෙනී සිටි නීතිඥවරයා අධිකරණය හමුවේ පවසා තිබෙනවා.
එලෙස පක්ෂයේ සාමාජිකත්වය නොමැති පිටස්තර අයකුට ජනාධිපතිවරණ අපේක්ෂකත්වය ලබාදීමට උත්සාහ දැරීමෙන්ම අයථා ගනුදෙනුවක් අනුව සිදුවී ඇති බව නිගමනය කළ හැකි බව ප්‍රධාන මහෙස්ත්‍රාත්වරයා මෙහිදී පවසා තිබුණා.
සෙසු සැකකරුවන් වෙනුවෙන් පෙනී සිටින නීතිඥවරුන් අධිකරණයට පවසා ඇත්තේ ඔවුන් හයදෙනා අතරින් කිහිපදෙනකු එදින එම ස්ථානයට පැමිණ ඇත්තේ ඔවුනට ලැබුණ දිවුරුම් කොමසාරිස් තනතුරුවලට අදාළ පත්වීම් ලිපිවල පැවැති අඩුපාඩුකම් කිහිපයක් නිවැරදි කර සකස් කර ගැනීම සඳහා බවයි.
අධිකරණ අමාත්‍යාංශයෙන් ලබාදුන් එකී පත්වීම් ලිපිවල යම් අඩු ලුහුඬුකමක් පැවැතියේනම් එය නිවැරදි කරගත යුත්තේ අධිකරණ අමාත්‍යාංශයට ගොස් මිස දේශපාලන පක්ෂ කාර්යාලයකට යෑමෙන් නොවන්නේ යැයි ප්‍රධාන මහෙස්ත්‍රාත්වරයා මෙහිදී පවසා තිබෙනවා.
සිය පක්ෂයේ ජනාධිපති අපේක්ෂක ධුරය ලබාදීම සඳහා රුපියල් කෝටි 03ක අල්ලස් මුදලක් ලබා ගැනීමට උත්සාහ කළ එක්සත් ලංකා පොදුජන පක්ෂයේ ලේකම් ඇතුළු නිලධාරීන් පිරිසක් අල්ලස් හෝ දූෂණ විමර්ශන කොමිෂන් සභාව මගින් පසුගිය අගෝස්තු 14 වෙනි දින පස්වරුවේ අත්අඩංගුවට ගනු ලැබුවා.
ඒ එම පක්ෂයෙන් ජනාධිපති අපේක්ෂකයා ලෙස ඇප මුදල් තැන්පත් කළ මහජන උපයෝගිතා කොමිසමේ හිටපු සභාපති ජනක රත්නායක මහතා සිදුකළ පැමිණිල්ලකට අනුවයි.
