වසර 64කට පසු ලෝක කුසලාන තරගාවලියක් නියෝජනය කරන වේල්සයේ අභිමානය බේරා ගැනීමට ගැරත් බේල් තරගයේ අවසන් මොහොතේ දඬුවම් පහරකින් සමත් වුණා.
ඒ ඇමෙරිකාව සමග පැවති තරගය ජය පරාජයෙන් තොරව අවසන් කර ගනිමින්.
තරගයේ පළමු භාගයේදී වේල්සයේ තරඟ රටාව උදාසීන වූ අතර ප්‍රබල ඇමෙරිකානුවන් 1 – 0 ක් ලෙස පෙරමුණ ගනිමින් එම අර්ධය අවසන් කළා.
ඒ තරගයේ 36 වැනි මිනිත්තුවේදී ක්‍රිස්ටියන් පුලිසික් ලබා ගත් ගෝලයත් සමගින්.
කෙසේ වෙතත් දෙවන අර්ධයේදී අදහාගත නොහැකි ජවයකින් තරගයට අවතීර්ණ වූ වේල්සය ඇමෙරිකානුවන්ට තවදුරටත් පන්දුව තම සීමාවෙන් ඔබ්බට රැගෙන ඒමට අවසර ලබා දුන්නේ නැහැ.
ඒ අනුව 1 – 1 ලෙස තරගය ජය පරාජයෙන් තොරව අවසන් වූ අතර මෙවර තරගාවලියේ විසඳුමක් නොලැබුණු පළමු තරඟය එයයි.
එංගලන්තය, ඉරානයට එරෙහිව 6-2 ක් ලෙස දැවැන්ත ජයක් වාර්තා කර තිබීම හේතුවෙන් වේල්සයට දෙවැනි වටය පිළිබඳ ඉහළ බලාපොරොත්තු රඳවා ගැනීමට හැකි වනු ඇති.
