ගුරුවරුන්ගේ වැටුප් ගැටළුව සම්බන්ධයෙන් මස් රාත්තලම ඉල්ලා සිටින බවට චෝදනා කරන රජයට කොවිඩ් වසංගත තත්ත්වය තුළත් ඇවිදින මංතීරු සෑදිමට මුදල් ඇතත් ගුරුවරුන්ට වැටුප් ගෙවීමට මුදල් නොමැතිවීම පුදුම සහගත බව ලංකා ගුරු සංගමයේ ලේකම් ජෝසප් ස්ටාර්ලින් මහතා සඳහන් කරනවා.
ඊයේ (01) කොළඹදි පැවති ප්‍රවෘත්ති සාකච්ඡාවක් අමතමින් ඔහු සඳහන් කළේ ගුරුවරුන්ගේ මුල් ඉල්ලීම වූ සුබෝධිනි කමිටු වාර්තාවෙන් යෝජනා කර තිබූ වැටුප් ගෙවීමේ ක්‍රමවේදයද වෙනුවට අමාත්‍ය අනුකමිටුවෙන් හෝ යෝජනා කළ වැටුප් ගෙවීමේ ක්‍රමවේදය සම්පූර්ණයෙන්ම ක්‍රියාත්මක කරන ලෙසයි.
කෙසේ වෙතත් අමාත්‍ය අනුකමිටුව මගින් යෝජනා කර තිබෙන ගුරු වැටුප් ගෙවීම සඳහා වෙන්කල යුතු බව සදහන් බිලියන 32 මුදල අයවැය යෝජනාවක් ලෙස එකවර ලබාදෙනවා වෙනුවට එයද කොටස් වශයෙන් ලබාදීමට කිසිසේත් එකඟවිය නොහැකි බව ස්ටාලින් මහතා පවසනවා.
ඒ අනුව අධ්‍යාපන අමාත්‍ය ජී.ඇල්.පීරිස් මහතා සදහන් කරන ලෙස එම මුදලද කොටස් 4 ක් ලෙස ලබාදුනහොත් ගුරු සේවයේ 3-2 පුද්ගලයෙකුට ලැබීමට නියමිත රුපියල් 3750 ක සම්පූර්ණ මුදලින් එක් කොටසක් ලෙස ලැබෙන්නේ වසරකටම රුපියල් 937 ක් වැනි ඉතා සුළු මුදලක් බව ඔහු පෙන්වා දෙනවා.
1997 සිට සෙසු රාජ්‍ය සේවයකන්ගේ වැටුප 60% කින් වැඩවන විට ගුරුවරුන්ට වැටුප් අහිමිවීම නිසාවෙන් වසර 24 ක් පුරාවටම ගුරුවරුන් දැඩිලෙස අපහසුතාවයට පත්ව සිටින බව ජෝසප් ස්ටාර්ලින් මහතා පවසනවා.
එම ගැටළුව විසදීම සඳහා පත්කළ සුබෝධිනි කමිටුවේ වාර්තාවට අනුව අදාළ ගුරු විදුහල්පති වැටුප ලබාදීමට වාර්ෂිකව රුපියල් බිලියන 71 ක් වෙන්කල යුතු බව සඳහන් කළත් මෙතෙක් ඒ සඳහා කිසිදු රජයක් ක්‍රියාත්මක නොවූ බව ඔහු වැඩිදුරටත් පෙන්වා දෙනවා.
