මේ වන විට වෙළඳපොළෙහි සීනි සහ කීරි සම්බා සහල්වල හිඟයක් පවතින බවට තොරතුරු වාර්තා වනවා.
පසුගියදා සීනි සඳහා බදු පැනවීමත් සමග වෙළඳපොළෙහි සීනි මිල ඉහළ ගිය අතර පසුව රජය විසින් සීනි සඳහා පාලන මිලක්ද පනවනු ලැබුවා.
පාරිභෝගික ජනතාව චෝදනා කරන්නේ ප්‍රමාණවත් තරම් වෙළඳපොළෙහි සීනි තොග නොමැති බවයි.
මුදල් රාජ්‍ය අමාත්‍ය රංජිත් සියඹලාපිටිය මහතා පවසන්නේ රට තුළ සීනි හිඟයක් ඇති වීමට ඉඩකඩක් නොමැති බවයි.
මේ වන විට රට තුළ සීනි මෙට්‍රික් ටොන් 19,000 ක් මේ වනවිට පවතින බව දැරණියගලදී අද (19) මාධ්‍ය වෙත අදහස් දක්වමින් ඔහු ප්‍රකාශ කළා.
එමෙන්ම වෙළඳ අමාත්‍ය නලීන් ප්‍රනාන්දු මහතා සඳහන් කළේ හෙට (20) දිනයේදී සීනි ආනයනකරුවන් සමඟ විශේෂ සාකච්ඡාවක් පවත්වන බවයි.
එහිදී සීනි මිල සහ හිඟයට විසදුම් ලැබෙනු ඇති බවද අමාත්‍යවරයා ප්‍රකාශ කළා.
වෙළඳ අමාත්‍ය නලීන් ප්‍රනාන්දු මහතා අද පැවති වැඩසටහනකින් අනතුරුව මාධ්‍ය වෙත අදහස් දක්වමින් ප්‍රකාශ කළේ කීරි සම්බා හිඟය මගහරවා ගැනීම සඳහා පිටරටින් එම සහල් ගෙන්වීමට කටයුතු කරන බවයි.
