සෞඛ්‍ය මාර්ගෝපදේශ නොසලකා උද්ඝෝෂණය කරන ගුරුවරුන් අතර නව කොවිඩ්-19 පොකුරක් ඇතිවීමේ හැකියාවක් පවතින බව ඖෂධ නිෂ්පාදන, සැපයුම් හා නියාමන අමාත්‍ය මහාචාර්ය චන්න ජයසුමන මහතා පවසනවා.
මහාචාර්ය ජයසුමන මහතා පවසා ඇත්තේ ඩෙල්ටා ප්‍රභේදය ලොව පුරා ව්‍යාප්ත වෙමින් පවතින අවස්ථාවක මෙම උද්ඝෝෂණ රැල්ල අනුමත කළ නොහැකි බවයි.
ගුරුවරුන් මෙසේ උද්ඝෝෂණය කරනු ලබන්නේ සම්පූර්ණයෙන්ම එන්නත ලබා දී නොමැති වාතාවරණයක බවයි ඔහු සදහන් කරන්නේ.
ඔවුන් අතර කොවිඩ්-19 පොකුරක් මතුවීම මුළුමනින්ම බැහැර කළ නොහැකි බවට විශේෂඥයින් විසින් ද පසුගිය දා අනතුරු ඇඟවීම් සිදු කර තිබූ බවද රාජ්‍ය අමාත්‍යවරයා පවසනවා.
චන්න ජයසුමන මහතා වැඩිදුරටත් පවසන්නේ ගුරුවරුන්ට ඔවුන්ගේ වෘත්තීය සමිති අයිතිවාසිකම් හිමි වන නමුත් කොවිඩ්-19 දරුණු ලෙස පැතිරී යන තත්ත්වයක රට පුරා උද්ඝෝෂණ පැවැත්වීම ඔවුන් අතර රෝගය පැතිරීමට හේතු විය හැකි බවයි.
කෙසේ වෙතත් පසුගියදා පැවති කතරගම පෙරහැරත් සමඟ කතරගමට දැවැන්ත බැතිමතුන් පිරිසක් සහභාගීවී සිටියා.
පෙරහැර අවසන්වීමෙන් අනතුරුව පැවති දියකැපීමේ මංගල්‍යයද ඉන්දියාවේ කුම්භමේලා සැණකෙළිය සිහිපත් කෙරෙන ආකාරයෙන් විශාල පිරිසකගේ සහභාගීත්වයෙන් පැවැත්වීමට සංවිධායකයන් කටයුතු කර තිබුණා.
එම අවස්ථාවට ආරක්ෂක අංශද සහභාගීවී සිටීම විශේෂත්වයක්.
