පනවා ඇති සංචරණ සීමා ක්‍රියාත්මක වීම ඉතා දුර්වල මට්ටමක පවතින බව හජන සෞඛ්‍ය පරික්ෂකවරුන්ගේ සංගමය පවසනවා.
නිසි පරිදි සීමා ක්‍රියාත්මක නොවන්නේ නම් ඇඳිරිනීතිය දීර්ඝකිරීමෙන් ඵලක් නොවන බවයි එම සංගමයේ සභාපති උපුල් රෝහණ මහතා පෙන්වා දෙන්නේ.
නිරෝධායන ඇඳිරිනීතිය පැවතියද වාහන සහ මහජනතාව විශාල වශයෙන් මාර්ගවල දක්නට ලැබෙන බවත් ජනතාව නිරෝධායන ඇඳිරිනීතියට අවනත නොවන සේ කටයුතු කරනවා නම් සහ බලධාරීන් නිරෝධායන ඇඳිරිනීතිය නොතකමින් බලපත්‍ර ලබාදීම් වැනි කටයුතු කරමින් මෙවැනි දේ වෙන්න ඉඩ අරිනවානම් සහ ජනතාවට අවශ්‍ය ලෙස සංචරණය කරන්නට ඉඩ අරිනවානම් මේ ඇඳිරිනීතිය ඵලරහිත බවත් ඔහු පෙන්වා දෙනවා.
ප්‍රාදේශීය ලේකම් කාර්යාල හරහාද බලපත්‍ර ලබාදීමක් සිදුවන බවත් ඒ බලපත්‍ර ලබාදීමට අමතරව නොයෙකුත් පාර්ශව නම්කර ඇති බවත්, එමෙන්ම, අත්‍යවශ්‍ය සේවාවලට මුවාවී විශාල සංඛ්‍යාවක් අනවශ්‍ය ලෙස මාර්ගයේ ගමන් කරන බැවින් ඔවුන්ට එරෙහිව දැඩි ක්‍රියාමාර්ග ගන්න ලෙස පොලිස් දෙපාර්තමේන්තුවේ අවධානය යොමු කරන බවත් ඔහු වැඩිදුරටත් පවසනවා.
