මහබැංකු අධිපති ධූරය කටු ඔටුන්නක් බව තමා දන්නා බව අජිත් නිවාඩ් කබ්රාල් මහතා පවසනවා.
ඊයේ (15) දින දෙවන වතාවටත් මහ බැංකු අධිපති ධූරයේ වැඩ භාරගනිමින් ඒ මහතා මේ බව ප්රකාශ කර සිටියා.
තමන් එම තනතුර දිගින් දිගටම ප්රතික්ෂේප කරද්දී ජනාධිපතිවරයාගේ දැඩි බලපෑම මත තමන් තනතුර භාරගැනීමට තීරණය කළ බවයි ඔහු පවසන්නේ.
ආර්ථිකය ගොඩගැනීමේ කටයුත්තේදී පරස්පර විරෝධී කටයුතු භාවිතා කිරීමට සිදුවනු ඇති බවත් ඉදිරි මාස කිහිපය තුළදී ආර්ථික තුලනයක් ලබා ගැනීමට උත්සහ කරන බවත් ඔහු පවසා සිටිනවා.
මෙහිදී වැඪිදුරටත් අදහස් දැක්වූ නව මහබැංකු අධිපතිවරයා.
“මට මතකයි, 2006දී එනකොටත් රටේ ආර්ථිකය යම් දුර්වල මට්ටමක තිබුණා. උද්ධමනය ඩබල් ඩිජිට් ගිහින් තිබුණේ. මට මතකයි එතකොට හිටපු නියෝජ්ය අධිපතිවරු මට කිව්වා, ‘ගවනර් මේක උත්සහ කරන්නවත් එපා,’ කියලා. ඒ වුණාට අපි ඒක කළා. උද්ධමනය අපි අඩු කළා. ඊට පස්සේ මම 12වෙනියා හැටියට මහ බැංකුවෙන් අයින් වෙලා යනකොට විදේශ සංචිත තිබුණා අමෙරිකානු ඩොලර් බිලියන 10.2ක පමණ මුදලක්.
අද එනකොට විදේශ සංචිත තියෙන්නේ ඩොලර් බිලියන 4යි. ඊට අමතරව තවත් බිලියන එකහමාරක් විතර තියෙනවා චීන බැංකුවේ. රුපියලේ අගය පිරිහිලා තිබෙනවා. විශේෂයෙන්ම කොවිඩ් වසංගතය සහ ලොක්ඩවුන් එක නිසා විරැකියාව වැඩි වේලා. දිළිඳුකමත් වැඩිවෙලා තියෙනවා. ඒ් නිසා අපිට අභියෝග රැසක් තිබෙනවා. අපි හැමෝම එකට එකතු වෙලා ගියොත් අපිට ඒක කරන්න පුළුවන් වෙනවා”