නායයාමේ අනතුරු ගැන රතු නිවේදන නිකුත් කර තිබියදීත් එම අවවාද නොතකා එම ස්ථානවලම රැදී සිටින පිරිස් බලහත්කාරයෙන් ඉවත් කිරීමට සිදුවන බව ආපදා කළමනාකරණ මධ්යස්ථානයේ අධ්යක්ෂ ජනරාල් මේජර් ජෙනරාල් සුදන්ත රණසිංහ මහතා අවධාරණය කරනවා.
ඒ, අද (11) ප්රවෘත්ති දෙපාර්තමේන්තුවේ පැවති මාධ්ය හමුවේදීයි.
ඒ අනුව උපදෙස් නොතකා රැඳී සිටින පිරිස් පොලීසියේ සහයෙන් ඉවත් කිරීමට දිසාපතිවරුන්ට අවසර දී තිබෙන බවයි රණසිංහ මහතා පවසන්නේ.
මෙහිදී වැඩිදුරටත් අදහස් දැක්වූ අධ්යක්ෂවරයා,
”ජනතාවට දෙන්න තියෙන අවසන් පණිවිඩය තමයි කරුණාකරලා ලබා දී තිබෙන උපදෙස් අනුව කටයුතු කරන්න.අවවාද පිළිගන්න. ඉවත් වෙන්න කියල දැනුවත් කළාම වහාම ඉවත් වෙන්න. කඳු තරණය කරන්න විනෝද වෙන්න යන්න එපා. නායේ යෑම් ගැන රතු නිවේදන නිකුත් කරලා තියෙද්දී ඉවත් වෙන්නේ නැති කණ්ඩායම් ඉන්නවා නම් ඉතාමත් පැහැදිලිවම පොලිස්පතිතුමාටත් මේ ගැන දැනුවත් කරලා තිබෙනවා. අවවාද පිළිනොගන්නේ නම් ඉවත් නොවන්නේ නම් දිසාපතිවරුන්ට බලය පවරලා තියෙනවා අනිවාර්යයෙන්ම පොලීසිය යොදවල උසාවි මාර්ගයෙන් බලහත්කාරයෙන් හෝ ඉවත් කිරීමට සිදුවෙනවා. ජාතික ආරක්ෂාව අනුව එය කරන්න සිදුවෙනවා. ජනතාවගේ කැමැත්තෙන් හෝ අකමැත්තෙන් මහජන ආරක්ෂාව ලබා දීම අපේ වගකීම. ”