දක්ෂිණ අධිවේගී මාර්ගයේ ගමන් ගන්නා පුද්ගලයන්ගේ පහසුව සඳහා එහි තවත් සේවා ප්‍රදේශ තුනක් ඉදිරියේදී ඉදිකිරීමට නියමිත බව මාර්ග සංවර්ධන අධිකාරිය පවසනවා.
මාර්ග සංවර්ධන අධිකාරියේ සභාපති C.P.K. අතලුවගේ මහතා සඳහන් කරන්නේ මේ සඳහා සුදුසු ප්‍රදේශ සොයා ගැනීම සඳහා නිරීක්ෂණ කටයුතු මේ වන විටත් ආරම්භ කර ඇති බවයි.
දක්ෂිණ අධිවේගී මාර්ගයේ මේ වන විට වැලිපැන්න අන්තර් හුවමාරුව අසල පමණක් එක් සේවා ප්‍රදේශයක් පවතිනවා.
කෙසේ වෙතත් දක්ෂිණ අධිවේගී මාර්ගය තවදුරටත් දීර්ඝ වන බැවින් එම මාර්ගය සඳහා එක් සේවා ප්‍රදේශයක් ප්‍රමාණවත් නොවන බවට නිරීක්ෂණය කර ඇති බවයි ඔහු සඳහන් කරන්නේ.
ඉදිකිරීමට නියමිත එක් සේවා ප්‍රදේශයක් මාතර හා මත්තල දක්වා මාර්ගය අසල ඉදිකිරීමට නියමිතයි.
දක්ෂිණ අධීවේගී මාර්ගයේ ගමන්ගන්නා බොහෝ රියදුරන්ගෙන් හා මගීන්ගෙන් පසුගිය කාලය පුරාවට ලැබුණු ඉල්ලීම් මේ සඳහා සළකා බැලුණු බව අතලුවගේ මහතා සදහන් කරනවා.
දක්ෂිණ අධිවේගී මාර්ගයේ පසුගිය කාලය පුරා අනතුරු රැසක් වාර්තා වුණා.
ඉන් බොහෝමයක් රියදුරාට නින්ද යෑම නිසා සිදුවූ අනතුරු බවටයි වාර්තා වුණේ.
කඩවත සිට මත්තල දක්වාම එක් සේවා ස්ථානයක් පැවතීම හේතුවෙන් එහි ගමන්ගන්නා මගීන් අපහසුතාවට පත්වන බවට විවිධ චෝදනාද එල්ල වුණා.
කෙසේ වෙතත් දක්ෂිණ අධිවේගී මාර්ගයේ දැනට ක්‍රියාත්මක සේවා ස්ථානයද එහි ආරම්භක අවස්ථාවේදී මෙන් නිසි පරිදි ක්‍රියාත්මක නොවන බවට තවත් චෝදනාවක් එල්ල වනවා.
එහි ඇතැම් කඩ මේ වන විටත් වසා දමා ඇති අතර රාත්‍රි කාලයේ ගමන් ගන්නා විට බොහෝමයක් කඩ වසා දමා තිබීම සුළභ දසුනක්.
මුල්කාලයේ මෙන් ආහාර පානද නිසි ප්‍රමිතියකින් පාරිභෝගිකයන් හට ලබා නොදෙන බවටද මගීන් චෝදනා කරනවා.
