සාම්ප්‍රදායික අයවැයකින් එහා ගිය අයවැයක් මෙවර රටට ඉදිරිපත් කෙරෙනු ඇති බවට තමා විශ්වාස කරන බව ජනාධිපති ලේකම් පී.බී. ජයසුන්දර මහතා පවසනවා.
ඒ, ජනාධිපති මාධ්‍ය කේන්ද්‍රයේදී ඊයේ (02) පෙරවරුවේ පැවති මාධ්‍ය හමුවේදීයි.
ශ්‍රී ලංකාව තුල ආදායම් උත්පාදනයට දායක වන භාණ්ඩ හා සේවාවල නිෂ්පාදන පරිමාව ඉහළ නැංවීමට හැකි ආදායම් ප්‍රතිපත්ති මෙවර අයවැයට ඇතුළත් වනු ඇති බවත් රට සාමාන්‍යකරණය වීමත් සමග නව ආර්ථික වර්ධනයක් අපේක්ෂා කරන බවත් ඔහු පෙන්වා දෙනවා.
දිගින් දිගට ම අයවැය පරතරය ඉහළ අගයක් ගැනීම රටකට හිතකර තත්ත්වයක් නොවන බැවින් මෙවර අයවැයේදී එම පරතරය අඩු කර ගැනීම කෙරෙහි අවධානය යොමු කර ඇතැයි මෙහිදී අදහස් දක්වමින් මුදල් අමාත්‍යංශයේ ලේකම් එස්.ආර්. ආටිගල මහතා සඳහන් කර සිටියා.
හරිත ආර්ථිකයක්, පුනර්ජනනීය බලශක්තිය, තොරතුරු තාක්ෂණය සහ ඩිජිටල් ආණ්ඩුකරණය යන ක්ෂේත්‍ර කෙරෙහි එහිදී ප්‍රමුඛතාව හිමි වනු ඇති බවත් ‘සෞභාග්‍යයේ දැක්ම’ තුළ කටයුතු කරමින් රටේ ආදායම් ඉහළ නංවා ගැනීම කෙරෙහි විශේෂ අවධානය යොමු කර ඇති බවත් මෙහිදී ප්‍රකාශ කෙරුණා.
