සංක්‍රාන්ති ලිංගික (Transgender) පුද්ගලයන් හට කතෝලික සභාව තුළ බෞතීස්මය ලැබිය බවට වතිකානුව නිවේදනයක් නිකුත් කර තිබෙනවා .
ඒ අනුව, බෞස්තීස්මයකදී දේව මාපියන් වීමට මෙන්ම විවාහ මංගල්‍යකදී සාක්ෂිකරුවන් ලෙස පෙනී සිටීමටද සංක්‍රාන්ති ලිංගික පුද්ගලයින්ට අවසර හිමි වන බව වතිකානු පල්ලියේ මූලධර්ම කාර්යාලයද ප්‍රකාශ කර තිබුණා.
විදෙස් මාධ්‍ය පවසන්නේ කතෝලික පල්ලිය තුළ සංක්‍රාන්ති ලිංගික පුද්ගලයින් හට වඩා හිතකර තත්වයක් නිර්මාණය කර දීමේ ෆ්‍රැන්සිස් පාප් වහන්සේගේ උත්සාහයේ ප්‍රතිඵලයක් ලෙස වතිකානුව මෙම තීරණයට එළඹ ඇති බවයි.
බ්‍රසීලියානු බිෂොප්වරයෙකු වන හොසේ නෙග්‍රි විසින් බෞතීස්මයට හා විවාහ උත්සවයන් හට විවිධ ලිංගික අනන්‍යතා සහිත පුද්ගලයන්ගේ (LGBT) සහභාගීත්වය කෙබඳු විය යුතුද යන්න පිළිබඳව ප්‍රශ්න හයක් වතිකානු පල්ලිය වෙත යොමු කර තිබුණා.
ඒ අනුව, එම ඉල්ලීමට ප්‍රතිචාරයක් වශයෙන් ෆ්‍රැන්සිස් පාප්තුමාගේ අත්සන සහිතව සංක්‍රාන්ති ලිංගිකයන් කතෝලික සභාව තුළ බෞතීස්ම කළ හැකි බව සඳහන් පිටු තුනක සටහනක් ඊයෙ (08) දිනයේ වතිකානු පල්ලියේ නිල වෙබ් අඩවිය මඟින් පළ කර තිබෙනවා.
සංක්‍රාන්ති ලිංගික පුද්ගලයින්ට මෙන්ම හෝමෝන ප්‍රතිකාර ලබා ගන්නා අයට සහ ලිංගික අනන්‍යතාව වෙනස් කිරීමේ ශල්‍යකර්මයකට භාජනය වූ අය ඇතුලු සෑම අයෙකුටම අනෙකුත් ඇදහිලිවන්තයන් හා සමානවම බෞතීස්මය ලබා ගත හැකි බව එම නිවේදනයේ සඳහන් කර තිබෙනවා.
