ඊශ්‍රායලය සහ ඉරානය යන රටවල දෙකම තමන් ප්‍රකාශ කළ සටන් විරාමය උල්ලංඝනය කර ඇති බවත් එබැවින් එම රටවල් දෙක පිළිබඳවත් තමා අසතුටු බවත් අමෙරිකානු ජනාධිපති ඩොනල්ඩ් ට්‍රම්ප් පවසා තිබෙනවා.
ට්‍රම්ප් වැඩිදුරටත් පවසා ඇත්තේ, විශේෂයෙන් ඊශ්‍රායලයේ ක්‍රියාවලිය කෙරෙහි සිය අප්‍රසාදය පළ කරන බවයි.
ඉරානය විසින් සටන් විරාමය උල්ලංඝනය කර ඇති බවත්, ඒ හේතුවෙන් බලවත් ප්‍රති ප්‍රහාර එල්ල කරන බවත් ඊශ්‍රායලය නිවේදනය කර තිබූ අතර “ඒ බෝම්බ හෙළන්න එපා” යනුවෙන් ට්‍රම්ප් සිය ප්‍රකාශයේ සඳහන් කර තිබෙනවා.
මතුව ඇති තත්වයත් සමඟ ඇමරිකානු ජනාධිපති ඩොනල්ඩ් ට්‍රම්ප් සහ ඊශ්‍රායල අගමැති බෙන්ජමින් නෙතන්යාහු දුරකථනය මඟින් සම්බන්ධ වී ඇති බවත් ඊශ්‍රායල මාධ්‍ය වාර්තා කරනවා.
ඉරානයට පහර නොදෙන ලෙස ට්‍රම්ප් ඉල්ලා සිටි බවත් ප්‍රහාරය අවලංගු කිරීමට තමාට නොහැකි බවත් ඉරානය සටන් විරාමය උල්ලංඝනය කර ඇති බැවින් එය අවශ්‍ය බවත් නෙතන්යාහු ට්‍රම්ප්ට යළි ප්‍රතිචාර දක්වමින් පවසා ඇති බවත් විදෙස් මාධ්‍ය වාර්තාවල වැඩිදුරටත් සඳහන්.
කෙසේවෙතත්, ප්‍රහාරය සැලකිය යුතු ලෙස අවම කිරීමටත් එක් ඉලක්කයකට පමණක් පහර දීමට ඊශ්‍රායලය එකඟ වී ඇති බවටත් වාර්තා වෙනවා.
මේ අතර, ට්‍රම්ප් සටන් විරාමයක් ප්‍රකාශයට පත් කිරීමෙන් පසුව ඇතැම් ඉරාන බලධාරීන් ජයග්‍රාහී ස්වරූපයෙන් අදහස් දක්වා ඇති අතර, ඇමරිකා එක්සත් ජනපදයට සහ බටහිර රටවලට ඉරානයේ බලය විදහා දැක්වූ බව උප ජනාධිපති මොහොමඩ් රේසා අරෙෆ් පවසා තිබෙනවා.
