තුර්කි ජනාධිපති තායෙප් එර්දොගාන් හා චීන ජනාධිපති ෂිගී ජින් පිං අතර හදිසි දුරකතන සාකච්ඡාවක් පවත්වා තිබේ.
විදෙස් මාධ්‍ය වාර්තා කරන්නේ චීනයේ ෂින්ජියෑන්ග්හි සුලුතර ප්‍රජාව වන උයිගුර් වැසියන් මුහුණදී සිටින තත්වය පිළිබදව සාකච්ඡා කිරීම සදහා තුර්කි ජනාධිපතිවරා විසින් චීන ජනාධිපතිවරයා අමතා ඇති බවයි.
චීනයේ ජාතික ඒකාබද්ධතාවට සහ ස්වෛරීභාවයට තම රට ඉහළින් ගරු කරන බව තුර්කි ජනාධිපති එර්දොගාන් මෙහිදී පවසා තිබේ.
කෙසේවෙතත්, ඔහු වැඩිදුරටත් පවසා ඇත්තේ උයිගුර් වැසියන්ට සාමකාමීව සහ නිදහස්ව සමාන අයිතිවාසිකම් භුක්ති විදිමින් ජීවත්වීමට අවකාශය තිබිය යුතු බවයි.
චීනයේ ෂින්ජියෑන්ග් ස්වයංපාලන කලාපයේ සමස්ත ජන සංඛ්‍යාවෙන් සියයට හතලිස් පහක් පමණ උයිගුර්වරුන් වන අතර ඔවුන්ගෙන් මිලියනයකට ආසන්න පිරිසක් අයිතිවාසිකම් සීමා කරනු ලැබ කදවුරුවලට යොමු කර ඇති බවට බටහිර රටවල් සහ අන්තර්ජාතික මානව හිමිකම් සංවිධාන දිගින් දිගටම චෝදනා කරයි.
