රෝහල් සෞඛ්‍ය කණිෂ්ඨ කාර්ය මණ්ඩල නිරත වූ සංකේත වැඩ වර්ජනය නිසා දිවයින පුරා රෝහල් විසි පහක සේවා සැපයීම් අද(17) අඩාල වී ඇත.
ඉල්ලීම් එකොලහක් මුල් කරගෙන මෙම සංකේත වැඩ වර්ජනය කොළඹ ජාතික රෝහල, මහනුවර රෝහල ඇතුළු ප්‍රධාන රෝහල් ගණනාවක දියත් කර තිබේ.
අමතර ගෙවීමක් නැතිව සතියකට නියමිත වැඩ පැය හතලිහට අමතරව තවත් පැය අටක් අතිරේකව සේවය කිරීම, නිල ඇඳුම් දීමනා ලබා නොදීම, උපස්ථායක පත්වීම් ලබා නොදීම, අවුරුදු 45 ඉක්මවා සේවයේ ස්ථිරවූවන්ගේ විශ්‍රාම වැටුප් අයිතිය අහිමිකිරීම ආදී කාරණා 11ක් මෙම ඉල්ලීම් අතර වේ.
ආදේශක සේවක සේවිකාවන් සේවයෙහි ස්ථිර නොකර සේවය ලබාගැනීම නිසා අර්බුදකාරී තත්ත්වයක් උද්ගතව ඇතැයි ද රෝගියකු වාර්තා වී නිරෝධායනය වීමට වුවහොත් එම නිරෝධායන කාලයේදී වැටුප් කප්පාදු වන්නේ යැයි ද ඒකාබද්ධ සෞඛ්‍ය සේවක සංගමයේ සංවිධායක රොෂාන් සමීර මහතා පවසයි.
මෙම වෘත්තිය ක්‍රියාමාර්ගයට නිසි පිළියමක් නොලැබෙන්නේ නම් ඉදිරි ක්‍රියාමාර්ග ගැනීමට සිදුවනු ඇතැයි ද සමීර මහතා වැඩිදුරටත් සඳහන් කරයි.
