මන්ත්‍රී වැටුප රුපියල් 54,385ක් වුවත් ශ්‍රී ලංකා නිදහස් පක්ෂයේ පාර්ලිමේන්තු කණ්ඩායම විසින් රුපියල් ලක්ෂය බැගින් කොවිඩ් රෝගීන්ට ප්‍රතිකාර කිරීම සඳහා පරිත්‍යාග කළ බව හිටපු ජනාධිපති, ශ්‍රී ලංකා නිදහස් පක්ෂයේ සභාපති මෛත්‍රීපාල සිරිසේන මහතා පවසනවා.
ඒ, ශ්‍රී ලංකා නිදහස් පක්ෂයේ සියලු පාර්ලිමේන්තු මන්ත්‍රීවරුන්ගේ ජූලි මස වැටුප පරිත්‍යාග කිරීමට අදාළ චෙක්පත පක්ෂ මූලස්ථානයේදී පක්ෂ සභාපති මෛත්‍රීපාල සිරිසේන මහතාට අද (24) භාරදීමේ අවස්ථාවට සහභාගී වෙමින්.
අඩුපාඩුකම් ඇති ප්‍රදේශවල ග්‍රාමීය රෝහල්වල අඩුපාඩුකම් සොයාබලා උපකරණ ලබාදීම වැනි කාර්යයන් ඉෂ්ට කිරීමට එම මුදල් යෙදවීමට බලාපොරොත්තු වන බව මෙහිදී හිටපු ජනාධිපතිවරයා පවසා සිටියා.
මෙහිදී වැඩිදුරටත් අදහස් දැක්වූ මෛත්‍රීපාල සිරිසේන මහතා,
“ඒ වගේම අපි තීරණය කරා ශ්‍රී ලංකා නිදහස් පක්ෂයේ 70 වන සංවත්සරය නිමිති කරගෙන සතියක් පක්ෂය අපි ප්‍රකාශයට පත් කළා රෝගීන් සඳහා ලේ පරිත්‍යාග කිරීමේ ව්‍යාපාරයක්. මේ තිබෙන භයානක අවස්ථාවේ අපේ වගකීම සහ යුතුකම වෙන්නේ. මිනිසුන් වෙනුවෙන් කළ හැක්කේ කුමක්ද ඒ කාර්යය අපි ඉෂ්ට කිරීමයි. මම මේ අවස්ථාවේ අපේ පාර්ලිමේන්තු කණ්ඩායමේ මැති ඇමතිවරුන්ට පෞද්ගලිකවත් පක්ෂ ඒ වෙනුවෙනුතුත්, ස්තුතිය හා ගෞරවය පිරිනමනවා.”
