ශ්‍රී ලංකා ක්‍රිකට් ක්‍රීඩකයින් ප්‍රවාහනය කරමින් සිටි පෞද්ගලික බස් රථයකින් හිස් උණ්ඩ දෙකක් සොයාගැනීමට ඉන්දීය චන්දිගාර් පොලිසිය සමත්වී තිබෙනවා.
සත්කාරක ඉන්දියාව සමඟ පැවැත්වෙන පළමු ටෙස්ට් තරගයට පෙර පුහුණු සැසි සඳහා මොහාලි හි පන්ජාබ් ක්‍රිකට් සංගමයේ ක්‍රීඩාංගණය අසල පිහිටි ඔවුන්ගේ හෝටලයට මෙම බස්රථය ගමන් කරමින් සිටි බව ඉන්දියන් එක්ස්ප්‍රස් වෙබ් අඩවිය වාර්තා කරනවා.
අදාළ බස් රථය ටාරා බ්‍රදර්ස් නම් පෞද්ගලික ප්‍රවාහන ආයතනයකින් කුලියට ගෙන ඇති බව පොලිසිය සදහන් කරනවා.
ශ්‍රී ලංකා ක්‍රීඩකයින් නවාතැන් ගෙන සිටින Lalit හෝටලයෙන් බස් රථයට ගොඩවීමට පෙර සාමාන්‍ය පරිදි පොලීසිය විසින් බස්රථය පරික්ෂා කිරීමේදී මෙම හිස් උණ්ඩ පොලීසිය විසින් සොයාගෙන තිබෙනවා.
ක්‍රිකට් ක්‍රීඩකයින් ප්‍රවාහනය කිරීමට පෙර මෙම බස්රථය විවාහ උත්සවයක් සඳහා අමුත්තන් ප්‍රවාහනය කිරීමට යොදාගෙන ඇති බව බස්රථයේ රියදුරු පොලීසියට සදහන් කර ඇති බව ඉන්දියානු පොලීසිය පවසනවා.
මෙම ටෙස්ට් තරඟය එළැඹෙන මාර්තු 4 සිට 8 දක්වා පැවැත්වීමට නියමිතයි.
