ඉන්ධන ලබා ගැනීම වෙනුවෙන් පැමිණි පුද්ගලයන් දෙදෙනෙක් ජීවිතක්ෂයට පත්ව තිබෙනවා.
දංකොටුව නගරය ආසන්නයේ පිහිටි ඉන්ධන පිරවුම් හලකින් ඉන්ධන ලබාගැනීමට පැමිණ පෝලිමේ සිටි පෞද්ගලික ඇඟලුම්හලක සේවක සේවිකවන් ප‍්‍රවාහනය කරනු ලබන බස්රථ රියදුරෙකු ඊයේ (09) රාත‍්‍රී 8.30 පමණ හදිස්සියේම ඇතිවූ රෝගතුර තත්වයක් හේතුවෙන් දංකොටව දිසා රෝහලට ඇතුලත් කිරීමෙන් අනතුරුව මියගොස් ඇතිබව දංකොටුව පොලීසිය පවසනවා.
මෙලෙස මියගොස් ඇත්තේ පන්නල ගෝනවිල එලිවිල ප්‍රදේශයේ පදිංචිව සිටි 47 හැවිරිදි එච් ඒ චමින්ද පුෂ්පකුමාර නැමති පුද්ගලයෙක්.
මියගියා පුද්ගලයා ධාවනය කරනු ලබන බස්රථයට ඉන්ධන ලබාගැනීම සඳහා දින දෙකක පමණ කාලයක් මෙම ඉන්ධන පිරවුම්හල අසළ පෝලිමේ සිට ඇතිබවද සඳහන්වේ.
මේ අතර මීගමුව – දංකොටුව මාර්ගයේ අද (10) උදෑසන 7.00 ට පමණ තඹරවිල ඉන්ධන පිරවුම්හලෙන් මෝටර් රථයට ඉන්ධන ලබාගැනීමට පැමිණි පුද්ගලයෙකු ඉන්ධන ලබාගැනීමෙන් අනතුරුව රෝදවලට හුළං ගසා ගැනීම සඳහා නවතා තැබීමෙන් පසු මෝටර් රථය තුළම මියගොස් සිටි බව වෙන්නප්පුව පොලීසිය පවසනවා.
මෙසේ මියගොස් ඇත්තේ කොච්චිකඬේ දඵවකොටුව තක්කියාපාර අංක 475,41 දරන ලිපිනයේ පදිංචි 50 හැවිරිදි මුහම්මදු සරීෆ්දීන් මුහම්මදු ජසීම් නැමති අයෙක්.
