අද (23) උදෑසන රාජගිරිය, ආයුර්වේද වටරවුම සහ ගුවන් පාළම ආසන්නයේ සිදුවූ රිය අනතුරකින් පොලිස් හදිසි ඇමතුම් ඒකකයට අනුයුක්තව සිටි උප පොලිස් පරීක්ෂකවරයෙක් සහ තවත් අයෙක් ජීවිතක්ෂයට පත්වුණා.
අධික වේගයෙන් පැමිණි වෑන් රථයක් රාජගිරිය, ආයුර්වේද වටරවුම ආසන්නයේ තිබූ මාර්ග බාධකයක රාජකාරී කරමින් සිටි නිලධාරීන් පිරිසක් මෙලෙස අනතුරට ලක්කර තිබෙනවා.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පැවසුවේ එම කණ්ඩායම භාරව සිටි 52 හැවිරිදි උප පොලිස් පරීක්ෂකවරයා මෙලෙස ජීවිතක්ෂයට පත්ව ඇති බවයි.
අනතුරින් ජීවිතක්ෂයට පත් අනෙක් පුද්ගලයා වන්නේ කුඩා ලොරි රථයක සහයකවරයෙකි.
මෙම ලොරි රථය අදාල මාර්ග බාධකයේ නවත්වා පරික්ෂා කරමින් සිට ඇති අතර එම අවස්ථාවේදී අධික වේගයෙන් පැමිණි වෑන්රථය එම ස්ථානයේ සිටි පිරිසේ ගැටී තිබෙනවා.
පොලිස් මාධ්‍ය ප්‍රකාශකවරයා සදහන් කරන්නේ. තලවතුගොඩ ප්‍රදේශයේ පදිංචිකරුවෙක් වන වෑන් රථයේ රියදුරුව මේ වන විට අත්අඩංගුවට ගෙන ඇති බවයි.
