කලා ප්‍රදර්ශනයක තිබූ ඇමරිකානු ඩොලර් මිලියන 6.4 ක් වටිනා රන් වැසිකිළියක් සොරකම් කළ පුද්ගලයින් දෙදෙනෙකුට බ්‍රිතාන්‍ය අධිකරණයක් විසින් වසර දෙකකට වැඩි සිර දඬුවමක් නියම කර තිබෙනවා.
2019 සැප්තැම්බර් මාසයේදී බ්ලෙන්හයිම් මාලිගයේ, ජනේලයක් කඩා දමා සොරුන් පස් දෙනෙකු විසින් සමකාලීන කලා කෘතියක් ලෙස ප්‍රදර්ශනය කරමින් තිබූ කැරට් 18 රත්‍රන්වලින් නිම කළ මෙම වැසිකිළිය සොරාගෙන තිබුණා.
මෙම කලා කෘතිය සැබෑවටම වැසිකිළියක් ආකාරයෙන් භාවිතයට ගත හැකි පරිදි නිමවා තිබූ අතර, පැහැර ගැනීමෙන් අනතුරුව එය කොටස් කර විකුණා දමා ඇති බවට විශ්වාස කෙරෙනවා.
මෙහිදී, සොරකම් කිරීම, කුමන්ත්‍රණය කිරීම සහ සොරාගත් දේපළ වෙනස් කිරීම සම්බන්ධයෙන් වරදකරු වූ කම්කරුවෙකු වන 40 හැවිරිදි ජේම්ස් ෂීන්ට, ඔක්ස්ෆර්ඩ් ක්‍රවුන් අධිකරණයේදී වසර හතරක සිර දඬුවමක් නියම වුණා.
ෂීන් අතවැසියා වූ 39 හැවිරිදි මයිකල් ජෝන්ස් සොරකම් කිරීම සම්බන්ධයෙන් වරදකරු කෙරුණු අතර ඔහුට වසර දෙකයි මාස තුනක සිර දඬුවමක් නියම වී තිබෙනවා.
මෙම වැසිකිළියේ බර රාත්තල් 215 කට වඩා වැඩි වූ නමුත් එහි ඇත්තේ රත්‍රන්වල බරට වඩා වැඩි වටිනාකමක්.
එවකට රත්තරන් වල වටිනාකමට අනුව මෙම වැසිකිළිය ඇමරිකානු ඩොලර් මිලියන 3.5 ක් වූ නමුත් එය පවුම් මිලියන 4.7 කට රක්ෂණය කර තිබුණා.
ඉතාලි සංකල්පීය කලාකරුවෙකු වන මොරිසියෝ කැටෙලන් මෙම වැසිකිළිය නිමවා තිබුනේ ඇමරිකාවේ පාරිභෝගික සංස්කෘතිය පිළිබඳ උපහාසාත්මක විවරණයක් ලෙසින්.
