ඇෆ්ගනිස්ථානයේ, කාබුල් අගනුවර පිහිටි රුසියානු තානාපති කාර්යාලය ඉදිරිපිට බෝම්බ පිපිරීමක් සිදුව තිබෙනවා.
මරාගෙන මැරෙන බෝම්බකරුවෙකු විසින් එම ප්‍රහාරය එල්ල කර ඇතැයි විදෙස් මාධ්‍ය පැවසුවා.
මෙම මරාගෙන මැරෙන බෝම්බ ප්‍රහාරය රුසියානු තානාපති කාර්යාලයේ කොන්සියුලර් අංශ පිවිසුම අසලදී එල්ලවී ඇති අතර සිද්ධියෙන් තානාපති කාර්යාලයේ නිලධාරීන් දෙදෙනකු ජිවිතක්ෂයට පත්ව තිබෙනවා.
සිදුවීමෙන් තුවාල ලැබූ තවත් 11 දෙනෙකු රෝහල් ගත කොට ඇති අතර මියගිය සහ තුවාල ලැබූ පිරිස තවත් ඉහළ යනු ඇති බවයි වාර්තා වන්නේ.
මරාගෙන මැරෙන බෝම්බකරු තානාපති කාර්යාලය අසලට පැමිණෙමින් සිටියදී එහි ආරක්ෂාවට යොදා සිටි තලෙයිබාන් සටන්කාමින් විසින් වෙඩි ප්‍රහාරයක් එල්ල කිරීමේදී , බෝම්බය පුපුරා ගොස් ඇති බවයි විදෙස් මාධ්‍ය සඳහන් කලේ.
කාබුල් අගනුවර පිහිටි සිය තානාපති කාර්යාලයට මරාගෙන මැරෙන බෝම්බ ප්‍රහාරයක් එල්ල වූ බවට රුසියානු විදේශ කටයුතු අමාත්‍යාංශය නිවේදනයක් නිකුත් කරමින් ප්‍රකාශ කර තිබේ.
ඇෆ්ගනිස්ථානයේ පාලනය තලෙයිබාන්වරුන්ට නතුවීමෙන් පසුව බොහෝ රටවල් එහි තානාපති සේවා කාර්යාල ඉවත් කරගනු ලැබුවද රුසියාව ඇතුළු රටවල් කිහිපයක් පමණක් තවදුරටත් එහි සේවා පවත්වාගෙන යනු ලබනවා.
