අග්‍රාමාත්‍ය පාර්ලිමේන්තු කටයුතු ලේකම් ධූරයට හිටපු පාර්ලිමේන්තු මන්ත්‍රී උදිත් ලොකුබණ්ඩාර මහතා පත්කර තිබෙනවා.
ඒ මහතාගේ පත්කිරීමට අදාළ ලිපිය අද (09) පෙරවරුවේ අග්‍රාමාත්‍ය මහින්ද රාජපක්ෂ මහතා අතින් අරලිය ගහ මන්දිරයේදී ලබාගෙන ඇති බව අග්‍රාමාත්‍ය මාධ්‍ය අංශය නිවේදනය කරනවා.
උදිත් සංජය ලොකුබණ්ඩාර මහතා හිටපු කතානායකවරයෙක් වූ විජමු ලොකුබණ්ඩාර මහතාගේ දෙවෙනි පුත්‍රයා වනවා.
බදුල්ල දිස්ත්‍රික්කය නියෝජනය කරමින් 2009 වසරේදී පාර්ලිමේන්තුවට තේරී පත්වූ උදිත් ලොකුබණ්ඩාර මහතා 2015 දක්වා පාර්ලිමේන්තුව නියෝජනය කළා.
2015 මැතිවරණයෙන් පසුව උදිත් ලොකුබණ්ඩාර මහතා මහින්ද රාජපක්ෂ මහතාගේ පෞද්ගලික ලේකම්වරයා වශයෙන් කටයුතු කළා.
එහිදී 2018 වසරේ දිනෙක මාධ්‍යවේදීන් ඉදිරියේ මහින්ද රාජපක්ෂ මහතා උදිත් ලොකුබණ්ඩාර මහතාට “මෝඩ යකෙක් මූ” ලෙසද බැණ වැදීම එකළ සමාජ මාධ්‍යවල දැඩි කතාබහකට ලක්වුණා.
