පකිස්තානයේ ජනමාධ්‍ය මුහුණදී සිටින මර්දනකාරී තත්වය පිළිබද එක්සත් ජාතීන්ගේ මානව හිමිකම් කවුන්සිලයේ අවධානය යොමුව තිබේ.
එම කවුන්සිලය විසින් පකිස්තාන රජය වෙත දැනුම් දී ඇත්තේ ජනමාධ්‍යවේදීන්ට සහ මානව හිමිකම් ක්‍රියාකාරිකයන්ට සිදුවන මර්දනයන් පිලිබද විශ්වසනීය සහ බරපතල තොරතුරු රැසක් තමන් වෙත ලැබී ඇති බවයි.
ඝාතන, පහරදීම්,තර්ජන පිලිබද සිදුවීම් රැසක් වාර්තා වී ඇතත් ඒ සම්බන්ධයෙන් නීතිය ක්‍රියාත්මක කර නොමැති බව සදහන් කර ඇති මානව හිමිකම් කවුන්සිලය වැඩිදුරටත් පෙන්වා දී ඇත්තේ යුක්තිය වෙනුවට විවිධ හිරිහැර සහ තර්ජනයන්ට මුහුණදීමට පකිස්තානයේ ජනමාධ්‍යයට සහ ජනමාධ්‍යවේදීන්ට සිදුව ඇති බවයි.
මෙම තත්ත්වය වෙනස් කිරීම සදහා කඩිනම් ක්‍රියාමාර්ග ගන්නා ලෙසද එම කවුන්සිලය පකිස්තානයට අවධාරණය කොට තිබේ.
මේ අතර පසුගිය වසරේදී ජාත්‍යන්තර ජනමාධ්‍යවේදීන්ගේ සම්මේලනය සදහන් කළේ ලොව ජනමාධ්‍යවේදීන්ට අහිතකරම රටවල් අතරින් පකිස්තානද එකක් බවයි.
