වර්තමානය වනවිට පාතාල ක්‍රියාකාරකම් සැළකිය යුතු ප්‍රමාණයකින් අඩු වී ඇති බව මහජන ආරක්ෂක අමාත්‍ය සරත් වීරසේකර මහතා පවසනවා.
වත්මන් ආණ්ඩුව අනුගමනය කරන කඩිනම් වැඩපිළිවෙල ඒ සඳහා හේතු වී ඇති බවයි ඇමතිවරයා පෙන්වා දෙන්නේ.
ඉදිරියේදී කප්පම් ගැනීම්, ස්ත්‍රී දූෂණ, ළමා අපචාර, මත්කුඩු ව්‍යාපාරය නැති කිරීම වෙනුවෙන් අවශ්‍ය පියවර ගන්නා බවත් ජනතාවට බියෙන් සැකෙන් තොරව ජීවත් විය හැකි සමාජයක් නිර්මාණය කිරීම තම අමාත්‍යංශයේ ප්‍රධානතම රාජකාරිය බවත් අමාත්‍යවරයා පවසනවා.
ඇමතිවරයා මෙම අදහස් පළකළේ පානදුර පිංවත්ත කොට්ඨාසයේ නව පොලිස් ස්ථානයක් විවෘත කිරීමේ අවස්ථාවට සහභාග‍ිවෙමිනි.
ජනතාවට කාර්යක්ෂම සේවාවක් ලබාදීමේ අරමුණින් හා අපරාධ අවම කිරීමේ අරමුණින් පොලිස් ස්ථාන ප්‍රමාණය ඉහළ දැමීමට තීරණය කර ඇති අතර එම වැඩපිළිවෙල යටතේ මෙම නව පොලිස් ස්ථානය පිහිටුවා තිබෙනවා.
එහිදී පොලිස් නිළධාරීන් අමතමින් ඇමතිවරයා සඳහන් කළේ ජනතාවට වඩාත් සාධාරණව හා නිවැරදිව රාජකාරි ඉටුකළ යුතු බවයි. අපක්ෂපාතීව හා සාධාරණව රාජකාරි සිදු කරන පොලිස් නිළධාරීන් පිළිබඳ සම්පූර්ණ වගකීම බාර ගැනීමට තමන් සූදානම් බවද ඇමතිවරයා පෙන්වා දෙනවා.
