එළඹෙන සීත කාලයේදී ඇෆ්ගනිස්ථානයේ ජනගහනයෙන් කෝටි දෙකක් පමණ දැඩි මානුෂීය අර්බුදයක‍ට මුහුණදීමේ අවදානමක් මතුව ඇති බැවින් ඒ සදහා වන සහන වැඩපිළිවෙළ‍ට දායක වන්නැයි එක්සත් ජාතීන්ගේ සරණාගතයන් පිළිබද ඒජන්සිය ලෝක ප්‍රජාවෙන් ඉල්ලා සිටියි.
මීට මාස කිහිපයක‍ට පමණ පෙර එක්සත් ජාතීන්ගේ සංවිධානය සදහන් කර තිබුණේ ඇෆ්ගනිස්තානයේ සහන සේවා කටයුතු සදහා ඇමරිකානු ඩොලර් මිලියන 606 ක් පමණ අවශ්‍ය වනු බවයි.
එහෙත් මේ වනතෙක් ලැබී ඇත්තේ ඉන් 35% පමණක් බවත් එය ප්‍රමාණවත් වන්නේ මාස දෙකක පමණ කාලයක සහන සේවා සදහා බවත් එක්සත් ජාතීන්ගේ සරණාගතයන් පිළිබද ඒජන්සිය සදහන් කරයි.
එක්සත් ජාතීන්ගේ සරණාගතයන් පිළිබද ඒජන්සියේ ප්‍රකාශිකා බාබරා බලොච් පවසන්නේ ඇෆ්ගනිස්තානයේ සිටින අභ්‍යන්තර අවතැන්වූවන් සදහා සහන සැලසීමට එරට දේශසීමාවෙන් පිටත විශේෂ මධ්‍යස්ථානයක් ස්ථාපිත කිරීමට සැලසුම් කර ඇති බවයි.
ඇෆ්ගනිස්තානයේ ආර්ථිකය මුලුමනින්ම බිද වැටී ඇති බවත්, මේ වන විට දිනකට ප්‍රමාණවත් ලෙස ආහාර ලබාගත හැකිව ඇත්තේ ඇෆ්ගනිස්තාන ජනසංඛ්‍යාවෙන් 5% තරම් සුලු පිරිසකට පමණක් බවත් බාබරා බලොච් වැඩිදුරටත් සදහන් කර ඇත.
