දිවයිනේ ප්‍රදේශ කිහිපයකින් හමු වූ නාඳුනන මළ සිරුරු කිහිපයක් සම්බන්ධව පොලීසිය නිවේදනයක් නිකුත් කර තිබෙනවා.
ඊයේ (18) දිනයේ දී මෙම මළ සිරුරු හමු වූ බවද පොලීසිය පවසනවා.
මිල්ලනිය පොලිස් වසමේ හල්තොට ඇල ඉවුරේ නාඳුනන මෘත ශරීරයක් ඇති බවට ඊයේ සවස මිල්ලනිය පොලිස් ස්ථානයට ලද පණිවුඩයක් මත විමර්ශනයක් ආරම්භ කර තිබුණා.
මෘත ශරීරයේ ඉන ප්‍රදේශයෙන් ඉහළ කොටස පමණක් ඇති බවට එහි අස්ථි කොටස් පමණක් ඉතිරි ව ඇති බවත් පොලීසියට එහිදී නිරීක්ෂණය වී තිබෙනවා.
මෘත ශරීරය මහෙස්ත්‍රාත් පරීක්ෂණය සඳහා පොලිස් ආරක්ෂාව යටතේ තබා ඇති අතර මිල්ලනිය පොලීසිය සිද්ධිය සම්බන්ධව වැඩිදුර විමර්ශන පවත්වනු ලබනවා.
මේ අතර, ඊයේ දහවල් කාලයේ කිරිඇල්ල පොලිස් වසමේ කුරුගම්මෝදර ප්‍රදේශයේ කළු ගඟේ මෘත ශරීරයක් ඇති බවට කිරිඇල්ල පොලිස් ස්ථානයට පණිවුඩයක් ලැබී තිබෙනවා.
ඒ අනුව, සිදුකල විමර්ශනයේදී නිරීක්ෂණය වී ඇත්තේ මෘත ශරීයේ අස්ථි කොටස් පමණක් ඉතිරිව ඇති බවත් හිස කොටස නොමැති බවයි.
මියගොස් ඇත්තේ පිරිමි පුද්ගලයෙකු බවද පොලීසිය අනාවරණය කරගෙන තිබෙනවා.
මියගොස් ඇති පුද්ගලයා ලා නිල් පැහැති දිග කලිසමක් හැඳ සිටි අයෙකු බවද පොලීසිය පවසනවා.
මෘත ශරීරය රත්නපුර රෝහලේ මෘත ශරීරාගාරයේ තැන්පත් කර ඇති අතර කිරිඇල්ල පොලීසිය වැඩිදුර විමර්ශන සිදුකරනු ලබනවා.
තවද මඩකලපුව පොලිස් වසමේ සින්න උප්පොඩි කලපුවේ කාන්තා මළ සිරුරක් ඇති බවට මඩකලපුව පොලිස් ස්ථානයට ලද පණිවිවුඩයක් ලැබී තිබෙනවා.
ඒ අනුව, සිදුකළ විමර්ශනයේදී අනාවරණය වී ඇත්තේ මියගොස් ඇත්තේ සිහින් සිරුරකින් හිමි වයස අවුරුදු 60-70ත් අතර කාන්තාවක් බවයි.
අවසන් වරට සුදු හා කොළ පැහැති මිශ්‍ර ගවුමකින් සැරසී සිට ඇති බවත් පොලීසිය පවසනවා.
මෘත ශරීරයේ අනන්‍යතාව මෙතෙක් තහවුරු වී නොමැති අතර මෘත ශරීරය මේ වන විට මඩකලපුව රෝහලේ මෘත ශරීරාගාරයේ තැන්පත් කර තිබෙනවා.
සිද්ධිය සම්බන්ධව මඩකලපුව පොලීසිය වැඩිදුර විමර්ශන සිදුකරනු ලබනවා.
