ඇෆ්ගනිස්තානයේ කාන්තා අයිතිවාසිකම් ආරක්ෂා කරන බවට ලබා දුන් පොරොන්දුව තලේබාන් පාලනය විසින් කඩ කර ඇති බව එක්සත් ජාතීන්ගේ මානව හිමිකම් පිළිබද මහකොමසාරිස් මිචෙල් බැචලේ සදහන් කරයි.
එක්සත් ජාතීන්ගේ මානව හිමිකම් කොමසාරිස්වරිය පෙන්වා දෙන්නේ සුළු වාර්ගික සහ ආගමික කණ්ඩායම්වල අයිතිවාසිකම් ද බරපතල ලෙස කඩවෙමින් ඇති බවයි.
බලයට පැමිණ අවස්ථාවේදී සියලු මානව හිමිකම් ආරක්ෂා කරන බවට සහතික වුවද මේ වනවිට භූමියේ ක්‍රියාත්මක වන්නේ වෙනස්ම තත්වයක් බව ඇය සදහන් කරයි.
පසුගිය ආණ්ඩු යටතේ විවිධ රැකියා සහ සේවාවල නිරත වූවන්ට පොදු සමාවක් ලබාදෙන බව ප්‍රකාශ කළ ද මේ වන විට තලේබාන් සංවිධානය ඔවුන් හඹායමින් සිටින බව ද මිචෙල් බැචලේ පවසයි.
ඇෆ්ගනිස්තානය ඉතා භයානක තත්වයක් කරා යොමුවෙමින් ඇති බව ද ඇය පෙන්වා දී තිබේ.
