මීරිගම මහනුවර මධ්‍යම අධිවේගී මාර්ගයේ ඊයේ (18) රාත්‍රියේ සිදුවූ රිය අනතුරකින් පුද්ගලයෙකු මිය ගොස් තවත් හතර දෙනෙකු තුවාල ලබා තිබෙනවා.
මෙසේ මිය ගොස් ඇත්තේ, 46 වන වියේ පසුවූ කැලණිය විශ්වවිද්‍යාලයේ දර්ශන අධ්‍යයන අංශයේ ජ්‍යෙෂ්ඨ කථිකාචාර්යවරයෙක්.
පසුගිය දා ඔහු සිය කුඩා දරුවන් තිදෙනා සහ බිරිඳ සමග යාපනය, නාගදීපයේ සංචාරයක ගොස් නැවත එමින් සිටිය දී මෙම අනතුරට මුහුණ දී තිබුණා.
මීරිගම සිට කිලෝමීටර 5ක් පමණ දුරින් මීරිගම දෙසට ධාවනය කරමින් තිබූ සිමෙන්ති ප්‍රවාහන ලොරියක් හා ආචාර්යවරයා සහ පවුලේ අය ගමන් ගත් වෑන් රථය එකිනෙක ගැටීමෙන් මෙම අනතුර සිදුව තිබෙනවා.
පොලීසිය පවසන්නේ, වෑන් රථය රියදුරුට පාලනය කර ගැනීමට නොහැකිව එම දිසාවටම ඉදිරියෙන් ගමන්ගත් ලොරි රථයේ ගැටී ඇති බවයි.
අනතුරින් තුවාල ලැබූ දරුවන් තිදෙනා, බිරිඳ සහ තවත් දෙදෙනෙකු මේ වනවිට කොළඹ ජාතික රෝහලේ ප්‍රතිකාර ලබමින් සිටිනවා.
අනතුර සම්බන්ධයෙන් වැඩිදුර විමර්ශන ක්‍රියාත්මකයි.
