මොඩර්නා එන්නත ලබා ගැනීමට නොහැකි වූ සරසවි සිසුන් පිරිසක් නිසා අද (25) උදෑසන නාරාහේන්පිට යුද හමුදා රෝහලේ පිහිටි එන්නත්කරණ මධ්‍යස්ථානයේදී නොසන්සුන්තාවයක් ඇති විය.
විශ්වවිද්‍යාල කිහිපයක සිසුන් විශාල පිරිසක් එම ස්ථානයට පැමිණ තිබූ අතර යුද හමුදා රෝහලේ නිලධාරියෙකු එම මධ්‍යස්ථානයේදී අදාල එන්නත ලබා නොදෙන බව ප්‍රකාශ කිරීමත් සමග මෙම උණුසුම් තත්වය ඇති විය.
ඒ අතර සිටි කැලණිය විශ්වවිද්‍යාලයේ සිසු පිරිස පැවසුවේ සිය විශ්වවිද්‍යාලයේ ලිපි ශිර්ෂය යටතේ උපකුලපතිවරියගේ නමින් නිකුත් කළ දැනුම්දීමක් අනුව තමන් මොඩර්නා එන්නත ලබා ගැනීමට පැමිණි බවයි.
කෙසේ නමුත් ඊයේ දිනයේදී මොඩර්නා එන්නත ලබාදී තිබූ බැවින් එලෙස ලබාදුන්නේ කුමන පදනමකින්ද යැයි විමසා සිටීමේදී යුද හමුදා නිලධාරියෙක් සඳහන් කළේ විදෙස්ගත වන සිසුන් උදෙසා ගුවන් ගමන් බලපත්‍ර පරීක්ෂා කර එලෙස එන්නත ලබාදුන් බවයි.
