කොවිඩ් හේතුවෙන් මියයන පුද්ගලයින්ගේ මළසිරුරු සම්බන්ධ තීරණය ආණ්ඩුව කඩිනමින් ගතයුතු බවත් සියලු ජනකොටස් සමග සාකච්ඡා කිරීමෙන් පසු පොදු එකඟතාවයකට පැමිණ එය ගතයුතු බවත් සිය ස්ථාවරය පැහැදිළි කරමින් එක්සත් ජාතික පක්ෂය නිවේදනයක් නිකුත් කර ඇත.
දෙසැම්බර් 28 දින එම පක්ෂයේ නියෝජ්ය නායක රුවන් විජේවර්ධන මහතාගේ අත්සනින් යුතුව එම නිවේදනය නිකුත් කර ඇත.
දෙසැම්බර් 23 වැනිදා පක්ෂ නායක රනිල් වික්රමසිංහ මහතාගේ ප්රධානත්වගෙන් පැවැති කෘත්යාධිකාරී මණ්ඩල රැස්වීමේදී වික්රමසිංහ මහතා අදාළ යෝජනාව ඉදිරිපත් කර ඇති අතර එය ඒකමතිකව අනුමත වී ඇති බවත් එම නිවේදනයේ සදහන්ව ඇත.
මෘතදේහයන් ආදාහනය කරන්නේද භූමදානය කරන්නේ ද යන්න තීන්දු කිරීම ඒ ඒ ජනකොටස්වල අයිතිවාසිකමක් බවත් විශේෂ අවස්ථාවකදී රජය ඒ සම්බන්ධයෙන් තීරණයක් ගැනීමට පෙර බෞද්ධ, හින්දු, කතෝලික සහ මුස්ලිම් ආගමික නායකයින් සමග සාකච්ඡා කළයුතු බවත් එක්සත් ජාතික පක්ෂයේ ස්ථාවරය වී තිබේ.