පාතාල නායක සමයංගෙන් පසු ඔහුගේ පාතාල ක්‍රියාකාරකම් මෙහෙය වූ බව පැවසෙන මාඹුලගේ දිනෙත් මෙලාන් මාඹුල හෙවත් ඌරුජුවා හට පොලීසිය විසින් වෙඩි තබා තිබෙනවා.
ඔහුව මෙලෙස ඝාතනය කර ඇත්තේ නවගමුව පොලීසිය විසින් බවයි පොලිස් මාධ්‍ය ප්‍රකාශකවරයා සඳහන් කරන්නේ.
නවගමුව සහ හංවැල්ල පොලිස් බල ප්‍රදේශවල සිදුවූ අපරාධ රැසක් සම්බන්ධයෙන් අවශ්‍යව සිටි සැකකරුවෙකු වන ඌරුජුවා පෙරේදා (10) නවගමුව පොලිසිය අත්අඩංගුවට ගනු ලැබුවා.
ඔහුගෙන් ප්‍රශ්න කිරීම්වලින් අනතුරුව ප්‍රකාශයක් සටහන් කරගෙන වැඩිදුර විමර්ශනයක් සඳහා අදාළ සැකකරු කඩුවෙල – වඳුරම්මුල්ල ප්‍රදේශයට රැගෙන ගිය අවස්ථාවේදී මෙම සිද්ධිය සිදුව ඇති බවයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා සඳහන් කරන්නේ.
එහිදී ඇතිවූ සිදුවීම කුමක්දැයි පොලිස් මාධ්‍ය ප්‍රකාශකවරයා සඳහන් කළේ නැහැ.
කෙසේ වෙතත්, මෙම සැකකරුගේ මියයෑම සම්බන්ධයෙන් බස්නාහිර පළාත දකුණ අපරාධ කොට්ඨාශය මගින් විමර්ශනයක් සිදුකරන බව පොලිස් මාධ්‍ය ප්‍රකාශකවරයා සඳහන් කරනවා.
