සොලමන් දූපත් සහ චීනය අතර පසුගිය 22 වනදා අත්සන් කරන ලද ආරක්ෂක ගිවිසුම ගැටලු සහගත බවත් මේ යටතේ චීනය සොලමන් දූපත් සමග කිසියම් මිලිටරි සබදතාවක් පවත්වාගෙන යන්නේ නම් තම රට “ඒ අනුව ප්රතිචාර දක්වනු ඇති බවටත් එක්සත් ජනපද නියෝජිතයන් අනතුරු අගවා තිබේ.
දකුණු පැසිෆික් දූපත් සමූහයේ චීන නාවික කඳවුරකට දොර විවර කළ හැකි බවට එක්සත් ජනපදය සහ අසල්වැසි රටවල් බිය පළ කර ඇති පසුබිමක ආරක්ෂක සහයෝගිතාව පිළිබඳ ගිවිසුමකට චීනය සහ සොලමන් දූපත් අත්සන් කරනු ලැබීය.
ඉහළ මට්ටමේ එක්සත් ජනපද නියෝජිත පිරිසක් අප්රේල් 22 වන දා සොලමන් දූපත්වල හොනියාරා වෙත ගොස්, මේ සම්බන්ධයෙන් අගමැති මනස්සේ සොගවරේ ඇතුළු ඔහුගේ කැබිනට් මණ්ඩලය සහ ජ්යෙෂ්ඨ කාර්ය මණ්ඩලයේ සාමාජිකයන් සමඟ විනාඩි 90 ක හමුවක් පවත්වා ඇත්තේ ඒ අනුවයි.
ගිවිසුම් ප්රකාරව මිලිටරි පැවැත්මක්, හමුදාව ස්ථාපනය කිරීමක් හෝ කලාපීය ආරක්ෂාවට තර්ජනයක් විය හැකි ඕනෑම ඇඟවුමක දී එක්සත් ජනපදයට සැලකිය යුතු කනස්සල්ලක් ඇති වන අතර ඒ අනුව ප්රතිචාර දක්වනු ඇතැයි එක්සත් ජනපද නියෝජිත කණ්ඩායම මෙම සාකච්ඡාවලදී අවධාරණය කර තිබේ.
මීට පෙර, චීන විදේශ අමාත්යාංශයේ ප්රකාශක වැන්ග් වෙන්බින් කියා සිටියේ ආරක්ෂක ගිවිසුමට සමාජ සාමය පවත්වා ගැනීම, මිනිසුන්ගේ ආරක්ෂාව, ආධාර, ස්වාභාවික විපත්වලට එරෙහිව සටන් කිරීම සහ ජාතික ආරක්ෂාව සඳහා හොනියාරා සමඟ සහයෝගයෙන් කටයුතු කිරීම ඇතුළත් වන බවයි.