ඉදිරි සතිය තුළ ජපානය තවත් ප්‍රබල භූමිකම්පාවකට මුහුණ දීමේ අවදානමක් පවතින බව එරට කාලගුණ විද්‍යා ඒජන්සිය අනතුරු ඇඟවීමක් නිකුත් කර තිබෙනවා.
එම ආයතනය පෙන්වා දී ඇත්තේ ජපානයේ නන්කායි අගල (Nankai Trough) පිහිටි ප්‍රදේශයේ මෙම අති ප්‍රබල මට්ටමේ මෙගා භූමිකම්පාවක් ඇතිවීමේ ඉහළ සම්භාවිතාවක් පවතින බවට මේ වනවිට හඳුනාගෙන ඇති බවයි.
ඉදිරි කාලයේදී එවැනි මෙගා භූමිකම්පාවක් සිදු වුවහොත්, එමඟින් හට ගන්නා දැඩි කම්පන තරංග සමඟ විශාල සුනාමි තත්වයක් අපේක්ෂා කරන බවද අදාළ නිවේදනයේ සඳහන්.
කෙසේ වෙතත් නිශ්චිත කාල සීමාවක් තුළ අදාළ භූ කම්පනය සිදුවන බවට පැවසිය නොහැකි බවත්, පවතින භූ ගෝලීය සාධක මත එවැනි භූ කම්පනයක් සිදුවීමේ හැකියාව මේ වනවිට ඉහළ මට්ටමක පවතින බවත් ඔවුන් විසින් නිකුත් කර ඇති නිවේදනය තුළින් පෙන්වාදෙනවා.
එමෙන්ම භූ විද්‍යාඥයන් සඳහන් කරන්නේ ජපානය තුළ භූ කම්පන ක්‍රියාකාරීත්වය පෙරට සාපේක්ෂව මේ වනවිට ඉහළ මට්ටමකට පැමිණ ඇති බවයි.
ජපානයේ නිරිතදිග පැසිෆික් වෙරළට ඔබ්බෙන් පිහිටා ඇති නන්කායි අගල ආසන්න වශයෙන් කිලෝමීටර 900 දක්වා දුරට විහිදී පවතින අතර, දළ වශයෙන් වසර 100 සිට 150 දක්වා කාලය තුළ මෙගා භූ කම්පනයක් ඇති වන බවට පසුගිය වසරේ සිදු කළ අධ්‍යනයන්ගෙන් හඳුනාගෙන තිබෙනවා.
ඒ අනුව එහි වඩාත්ම මෑත කාලීන ප්‍රබල මට්ටමේ භූ කම්පනය සිදුව ඇත්තේ වර්ෂ 1946 දෙසැම්බර් 21 වන දින වන අතර එම අවස්ථාවේදී එහි ප්‍රබලත්වය රික්ටර් මාපක 8.1 ත් 8.4 අතර අගයක් සටහන් වී ඇති බවයි පැවසෙන්නේ.
නන්කායි අගලේ ඇති විය හැකි බවට සැකකෙරන දරුණුම භූමි කම්පාවකදී මතු විය හැකි සුනාමි බලපෑමකින් පුද්ගලයන් 323,000 ක් පමණ මිය යා හැකි බවට අනුමාන කර තිබෙනවා.
ඒ සමඟ එරට කාලගුණ විද්‍යා ඒජන්සිය විසින් ටෝකියෝ අවට ප්‍රදේශවල සිට දකුණු ඔකිනාවා ප්‍රාන්තයේ ප්‍රදේශ දක්වා විහිදෙන කලාපයේ ඇති මහ නගර සභාවලට ඔවුන්ගේ භූමිකම්පා සූදානම පරීක්ෂා කරන ලෙසට දැනුම් දී ඇති බවද සඳහන්.
