ගුරු විදුහල්පති අරගලය ත්රස්තවාදයට සමාන කරමින් අමාත්ය සරත් වීරසේකර මහතා ප්රකාශයන් සිදු කළද ඔහුගේ කතාවලට බිය නොවන බව ගුරු විදුහල්පති ඒකාබද්ධ සන්ධානය වෙනුවෙන් ලංකා ගුරු සංගමයේ ප්රධාන ලේකම් ජෝශප් ස්ටාලින් මහතා පවසනවා.
ඒ, අද (15) කොළඹදී පැවති මාධ්ය හමුවේදීයි.
මීට ඉහතදීද ගුරුවරුන්ව අපරාධ පරීක්ෂණ දෙපාර්තමේන්තුවට කැඳ වූ නමුත් ඔහුට කිසිවක් කිරීමට නොහැකි වූ බවත් රථ පෙළපාලියට පැමිණි ගුරුවරු කණ්ඩායමක්ද අත්අඩංගුවට ගෙන මර්දනය කිරීමට සැරසුණු බවත් ස්ටාලින් මහතා සිහිපත් කර සිටිනවා.
සරත් වීරසේකර අමාත්යවරයාගේ මර්දනයට යටත් වීමට සූදානම් නොමැති බවයි ජෝශප් ස්ටාලින් මහතා පවසන්නේ.
මේ රටේ අධ්යාපනය කඩාකප්පල් වූයේ ගුරු විදුහල්පතිවරුන්ගේ අරගලය නිසා නොවන බව දෙමාපියන්ට සිහිපත් කළ යුතුව ඇති බවත් අධ්යාපන අර්බුදයක් ඇති වූයේ ගුරුවරුන්ගේ වර්ජනය නිසා යැයි රජය තමන්ගේ නොහැකියාව ගුරුවරු පිට පටවමින් සිටින බවත් ඔහු පවසනවා.
“විභාග ප්රතිඵල පරක්කු වුණේ ගුරු වර්ජනය නිසාද? විභාග තියන්න බැරි ගුරු අරගලය නිසාද? ඒවා ඔක්කොම කල් යන්නේ කොරෝනා වසංගත තත්ත්වය තුළ. අපේ ක්රියාවෙන් බාධාවක් වුණා නම් වුණේ ඔන්ලයින් ඉගැන්වීම් වලට. එයටත් හේතුව අවශ්ය වෙලාවට අවශ්ය ලෙස ප්රශ්නයට උත්තරයක් ලබා නොදීම.” යැයි ඔහු පවසනවා.